صوبائی ڈیزاسٹر مینجمنٹ اتھارٹی (پی ڈی ایم اے) نے خیبر پختونخوا میں حالیہ بارشوں، سیلاب اور لینڈ سلائیڈنگ کے باعث جانی و مالی نقصانات کی تفصیلی رپورٹ جاری کردی ہے۔
یہ بھی پڑھیں ملک بھر میں بارشوں کا سلسلہ برقرار، سیلاب الرٹ جاری
پی ڈی ایم اے کے مطابق 27 جون سے اب تک مختلف حادثات میں مجموعی طور پر 21 افراد جاں بحق اور 10 زخمی ہوئے۔ جاں بحق ہونے والوں میں 7 مرد، 5 خواتین اور 9 بچے شامل ہیں، جبکہ زخمیوں میں 6 مرد، 3 خواتین اور ایک بچہ شامل ہے۔
رپورٹ کے مطابق بارشوں سے مجموعی طور پر 57 گھروں کو نقصان پہنچا، جن میں سے 51 مکانات کو جزوی اور 6 کو مکمل طور پر نقصان پہنچا یا وہ منہدم ہوگئے۔ یہ حادثات صوبے کے مختلف اضلاع سوات، ایبٹ آباد، لوئر چترال، بونیر، صوابی، کرم، چارسدہ، ملاکنڈ، شانگلہ، لوئر دیر اور تورغر میں پیش آئے۔
رپورٹ میں کہا گیا ہے کہ سب سے زیادہ متاثر ضلع سوات رہا، جہاں 14 افراد جاں بحق اور 6 زخمی ہوئے۔ پی ڈی ایم اے نے ضلعی انتظامیہ کو ہدایت جاری کی ہے کہ متاثرہ خاندانوں کو فوری ریلیف فراہم کیا جائے اور زخمیوں کو بروقت اور معیاری طبی سہولیات دی جائیں۔
یہ بھی پڑھیں سانحہ سوات پر اجلاس، سیلاب کے دوران لائف جیکٹس اور رسیوں کی ترسیل کے لیے ڈرونز خریدنے کا فیصلہ
مزید برآں پی ڈی ایم اے نے امکان ظاہر کیا ہے کہ بارشوں کا سلسلہ یکم جولائی تک جاری رہے گا، اور اس سلسلے میں ضلعی انتظامیہ کو پہلے ہی الرٹ رہنے اور پیشگی حفاظتی اقدامات کرنے کی ہدایات جاری کی جا چکی ہیں۔
