آئل اینڈ گیس ریگولیٹری اتھارٹی (اوگرا) نے عوام کو مہنگائی کے دباؤ سے کچھ ریلیف دیتے ہوئے مائع پیٹرولیم گیس (ایل پی جی) کی قیمت میں کمی کا اعلان کردیا۔
اوگرا کی جانب سے جاری کردہ نوٹیفکیشن میں بتایا گیا ہے کہ جولائی 2025 کے لیے ایل پی جی کی قیمت 7 روپے 43 پیسے فی کلو کم کر دی گئی ہے، جس کے بعد نئی قیمت 233 روپے 10 پیسے فی کلو ہوگی۔
اسی طرح 11.8 کلوگرام وزن کے گھریلو ایل پی جی سلنڈر کی قیمت میں بھی نمایاں کمی کی گئی ہے۔ نوٹیفکیشن کے مطابق گھریلو سلنڈر 87 روپے 71 پیسے سستا ہو گیا ہے، جس کے بعد اس کی نئی قیمت 2 ہزار 751 روپے ہوگئی ہے۔
اوگرا نے واضح کیا ہے کہ ایل پی جی کی نئی قیمتوں کا اطلاق یکم جولائی 2025 سے ہوگا، جس کے بعد ملک بھر میں گیس صارفین کو یہ قیمتیں لاگو ہوں گی۔
یہ فیصلہ ایسے وقت میں سامنے آیا ہے جب ملک بھر میں مہنگائی کا گراف بلند ہے اور عوام اشیائے ضروریہ کی قیمتوں میں کمی کی امید لگائے بیٹھے ہیں۔ ایران اسرائیل جنگ کے دوران ایل پی جی کی قیمتوں میں اضافہ ہوگیا تھا۔
