وفاقی وزیر داخلہ محسن نقوی نے بحرین کے دارالحکومت منامہ کا ایک روزہ سرکاری دورہ کیا، اس دورے کا مقصد دوطرفہ تعلقات کو مضبوط بنانا اور داخلی سلامتی کے معاملات میں تعاون کو فروغ دینا تھا۔
منامہ انٹرنیشنل ایئرپورٹ پہنچنے پر بحرین کے وزیر داخلہ جنرل شیخ راشد بن عبداللہ نے ان کا پرتپاک استقبال کیا۔ اس کے بعد بحرین کی وزارت داخلہ میں ایک رسمی تقریب منعقد ہوئی، جہاں محسن نقوی کو گارڈ آف آنر پیش کیا گیا، جو دونوں ممالک کے درمیان قریبی دوستی کی علامت ہے۔
دونوں وزرائے داخلہ کے درمیان اعلیٰ سطح کی ملاقات ہوئی جس میں اہم امور پر تبادلہ خیال کیا گیا۔ بات چیت کا محور داخلی سلامتی، انسداد دہشت گردی، منشیات کے خلاف اقدامات اور انسانی اسمگلنگ کی روک تھام جیسے شعبے تھے۔
Pakistan and Bahrain have emphasized the need to further strengthen their security collaboration@ForeignOfficePk @MOIofficialGoP @MohsinnaqviC42 #RadioPakistan #News https://t.co/qkwOiCy5y1 pic.twitter.com/FNAmuFZovz
— Radio Pakistan (@RadioPakistan) July 12, 2025
محسن نقوی نے منشیات کی اسمگلنگ اور انسانی اسمگلنگ کے نیٹ ورکس کے خلاف مؤثر کارروائی کے لیے مضبوط تعاون کی ضرورت پر زور دیتے ہوئے کہا کہ ان سرحد پار خطرات سے نمٹنے کے لیے بین الاقوامی اشتراکِ عمل ناگزیر ہے، انہوں نے قانون نافذ کرنے والے اداروں اور انٹیلی جنس کے تبادلے کے شعبے میں بحرین کے ساتھ سیکیورٹی تعلقات مزید گہرا کرنے کا عزم بھی ظاہر کیا۔
جنرل شیخ راشد نے خطے میں امن و سلامتی کے لیے پاکستان کی کوششوں کو سراہا۔ انہوں نے کہا کہ بحرین دونوں ممالک کے درمیان جاری تعاون کو قدر کی نگاہ سے دیکھتا ہے اور اس شراکت داری کو مزید وسعت دینے کے لیے تیار ہے۔ انہوں نے نئے سیکیورٹی چیلنجز سے نمٹنے کے لیے قریبی اشتراک پر بھی آمادگی ظاہر کی۔
دونوں ممالک نے پولیس اور سیکیورٹی اداروں کے لیے مشترکہ تربیتی پروگرام شروع کرنے، جرائم کی روک تھام سے متعلق بہترین طریقہ کار کے تبادلے، اور سیکیورٹی امور پر باقاعدہ رابطے کا نظام وضع کرنے پر بھی اتفاق کیا۔
یہ دورہ خوشگوار اور مثبت نوٹ پر اختتام پذیر ہوا، جہاں دونوں ممالک نے باہمی اعتماد اور احترام کی بنیاد پر طویل المدتی اسٹریٹجک شراکت داری قائم کرنے کے عزم کا اعادہ کیا۔
