اسلام آباد ٹریفک پولیس (آئی ٹی پی) نے جدید ڈرون ٹیکنالوجی کا استعمال کرتے ہوئے شہر کی بڑی شاہراہوں پر ٹریفک کی نگرانی کا نیا اور اسمارٹ نظام متعارف کروا دیا ہے۔ ابتدائی طور پر یہ نگرانی اسلام آباد ایکسپریس وے اور سری نگر ہائی وے پر کی جا رہی ہے، جس کے نتیجے میں اب تک 300 سے زائد ٹریفک قوانین کی خلاف ورزی کرنے والے ڈرائیوروں کو جرمانے کیے جا چکے ہیں، جبکہ 350 سے زائد شہریوں کو آگاہی فراہم کی گئی ہے۔
آئی ٹی پی کے ترجمان کے مطابق یہ مہم ٹریفک قوانین کی سختی سے عمل درآمد کے لیے ایک جامع منصوبے کا پہلا مرحلہ ہے، جس میں فضائی نگرانی کے ذریعے لین ڈسپلن، غیر قانونی اوور ٹیکنگ، اوور لوڈنگ اور ون ویلنگ جیسی خلاف ورزیوں پر فوری نظر رکھی جا رہی ہے۔
مزید پڑھیں: اسلام آباد ٹریفک پولیس کی زیرو ٹالرینس مہم، ایک ہفتے میں 112 مقدمات، ہزاروں جرمانے
انہوں نے بتایا کہ ڈرون کے ذریعے خلاف ورزیوں کی فوری شناخت کے بعد موقع پر ہی کارروائی کی جاتی ہے، جس میں جرمانے، گاڑیوں کی ضبطی اور بعض صورتوں میں گاڑیوں کو تھانوں میں منتقل کرنا شامل ہے۔
چیف ٹریفک آفیسر کیپٹن (ر) سید ذیشان حیدر کی ہدایت پر ٹریفک قوانین کی خلاف ورزیاں روکنے کے لئے ڈرون ٹیکنالوجی کا استعمال۔
لین وائلیشن والی متعدد گاڑیوں کے خلاف قانونی کارروائی عمل میں لائی گئی۔#WeRIslamabadPolice #ICTP #ITP #Islamabad pic.twitter.com/uLz1ImtiYI
— Islamabad Police (@ICT_Police) July 12, 2025
ترجمان نے مزید کہا کہ یہ نظام نہ صرف قوانین پر عملدرآمد میں مددگار ہے بلکہ شہر کے ان علاقوں کی نشاندہی بھی کرتا ہے جہاں ٹریفک کا دباؤ زیادہ ہوتا ہے، جس پر آئی ٹی پی کی اسپیشل رسپانس ٹیمیں بروقت پہنچ کر ٹریفک کو مؤثر انداز میں کنٹرول کرتی ہیں۔
مزید پڑھیں: اسلام آباد ٹریفک پولیس کی شہری سے بدتمیزی: ‘تصویر کا دوسرا رخ بھی دیکھ لیا کریں’
چیف ٹریفک آفیسر کیپٹن (ر) سید ذیشان حیدر نے کہا ہے کہ اگلے مرحلے میں ڈرون آپریشنز کو اسلام آباد کے تمام سیکٹرز اور دیگر اہم شاہراہوں تک وسعت دی جائے گی۔ ان کے مطابق ڈرون ٹیکنالوجی خلاف ورزیوں کی فوری شناخت اور شفاف کارروائی کو یقینی بنانے میں انتہائی مؤثر ثابت ہو رہی ہے۔
یہ اقدام اسلام آباد میں ٹریفک نظام کی بہتری کی جانب ایک اہم پیشرفت تصور کیا جا رہا ہے، جس سے نہ صرف قانون شکنی پر قابو پایا جا سکے گا بلکہ شہریوں کی زندگیوں کو بھی محفوظ تر بنایا جا سکے گا۔
