ویتنام کے مشہور سیاحتی مقام ہالونگ بے میں کشتی طوفان کے دوران الٹنے سے کم از کم 27 افراد ہلاک ہو گئے ہیں جن میں 8 بچے بھی شامل ہیں۔ حادثہ ہفتہ کے روز دوپہر اس وقت پیش آیا جب طوفان وِپھا (Wipha) خطے کے قریب پہنچ رہا تھا۔
میڈیا رپورٹس کے مطابق کشتی میں کل 53 افراد سوار تھے جن میں اکثریت سیر کے لیے آئے خاندانوں کی تھی جن میں 20 سے زائد بچے بھی سوار تھے۔
سرکاری خبر رساں ایجنسی کے مطابق 11 افراد کو زندہ بچا لیا گیا ہے جبکہ مزید افراد کی تلاش کے لیے امدادی کارروائیاں رات بھر جاری رہیں۔
یہ بھی پڑھیے: تربیلا ڈیم میں کشتی الٹنے سے ایک ہی خاندان کے 5 افراد ڈوب گئے
ویتنام کے وزیر اعظم فام منہ چنھ نے جاں بحق ہونے والوں کے لواحقین سے گہرے افسوس اور تعزیت کا اظہار کیا ہے۔ حکومت نے واقعے کی تحقیقات کا حکم دے دیا ہے اور وعدہ کیا ہے کہ غفلت کے مرتکب افراد کے خلاف سخت کارروائی کی جائے گی۔
ویتنام کا شہر ہالونگ بے جو اپنے نیلے پانی اور سرسبز چٹانوں کے لیے مشہور ہے، ہر سال لاکھوں سیاحوں کو اپنی طرف کھینچتا ہے۔
طوفان وِپھا کی وجہ سے ہنوئی میں درخت گرنے اور پروازوں کی معطلی کی اطلاعات بھی موصول ہوئیں جس کے بعد 9 پروازیں دوسرے ہوائی اڈوں کی طرف موڑ دی گئیں جبکہ تین پروازوں کو عارضی طور پر روک دیا گیا۔
