ڈی جی ایف آئی اے رفعت مختار راجا کی ہدایت پر حوالہ ہنڈی اور غیر قانونی کرنسی ایکسچینج میں ملوث نیٹ ورکس کے خلاف کارروائیاں تیز کردی گئیں۔ اس سلسلے میں ایف آئی اے بلوچستان زون نے بڑی کامیابیاں حاصل کی ہیں۔
ترجمان ایف آئی اے کے مطابق وفاقی تحقیقاتی ادارے نے مختلف چھاپہ مار کارروائیوں کے دوران حوالہ ہنڈی اور غیر قانونی کرنسی کاروبار میں ملوث 16 ملزمان کو گرفتار کر لیا۔
یہ بھی پڑھیں: بلوچستان: حوالہ ہنڈی اور غیر قانونی کرنسی ایکسچینج میں ملوث 16 افراد گرفتار
ترجمان نے بتایا کہ گرفتار افراد میں محمد رمضا، احمد، عبدالکریم، خیر محمد، عبد الاحد، رحمت اللہ، عبد الباقی، علاؤالدین، عبد المالک، عبد الصمد، سید گل، مہدی، سعید خان، حاجی نذیر، حاجی عبد الواحد اور اسداللہ شامل ہیں۔
یہ گرفتاریاں بلوچستان کے مختلف علاقوں میں چھاپہ مار کارروائیوں کے دوران عمل میں آئیں۔ کارروائیوں کے دوران مجموعی طور پر 39 لاکھ 61 ہزار پاکستانی روپے برآمد کیے گئے۔
ترجمان نے بتایا کہ غیر ملکی کرنسی کی مد میں 6047.9 ملین ایرانی ریال، 15 لاکھ 56 ہزار عراقی دینار، 8800 افغان افغانی، 1000 کورین وان، 400 ترک لیرا اور 144 امریکی ڈالر بھی برآمد کیے گئے۔
ترجمان کے مطابق ملزمان سے موبائل فونز اور حوالہ ہنڈی سے متعلق دیگر شواہد بھی قبضے میں لیے گئے ہیں۔
یہ بھی پڑھیں: حوالہ ہنڈی اور غیر قانونی کرنسی ایکسچینج میں ملوث نیٹ ورک کے 5 کارندے گرفتار
ترجمان کے مطابق گرفتار ملزمان برآمد شدہ کرنسی کے بارے میں حکام کو تسلی بخش وضاحت نہ دے سکے۔ ایف آئی اے نے تمام ملزمان کو حراست میں لے کر مزید تفتیش کا آغاز کردیا ہے۔
