بھارت نے 28 اور 29 جولائی کو مسلسل 2 روز ’پرلے‘ میزائل کے تجربات کیے ہیں، جنہیں اڈیسہ کے ساحلی علاقے میں واقع ڈاکٹر اے پی جے عبدالکلام جزیرے پر انجام دیا گیا۔ مبصرین اور تجزیہ کار ان اقدامات کو خطے میں اسلحے کی نئی دوڑ اور امن کے امکانات کے خلاف ایک سنگین خطرہ قرار دے رہے ہیں۔
یہ میزائل تجربات ایسے وقت میں کیے گئے جب بھارتی فوج مبینہ طور پر آپریشن سندور کے دوران مقبوضہ کشمیر میں اپنے مقاصد حاصل کرنے میں ناکام رہی۔ مبصرین کا کہنا ہے کہ نریندر مودی کی حکومت اس فوجی ناکامی پر پردہ ڈالنے کے لیے جنگی جنون کو ہوا دے رہی ہے اور میزائل نمائش کے ذریعے سیاسی مقاصد حاصل کرنا چاہتی ہے۔
مزید پڑھیں: آپریشن سندور حکومت کی انٹیلی جنس ناکامی کی علامت ہے، اکھلیش یادو
ماہرین دفاع کا ماننا ہے کہ بھارت کی جانب سے ’پرلے‘ جیسے میزائلوں کی نمائش جنوبی ایشیا میں کشیدگی کو بڑھا سکتی ہے اور اس سے خطے میں ایک نئی اور مہلک اسلحہ دوڑ کا آغاز ہو سکتا ہے۔ تجزیہ کار اسے مودی حکومت کی ایک ایسی حکمتِ عملی قرار دیتے ہیں جس میں داخلی سیاسی ناکامیوں سے توجہ ہٹانے کے لیے فوجی طاقت کا مظاہرہ کیا جاتا ہے۔
ادھر پاکستان نے بھارت کی اس جنگی مہم جوئی کا منہ توڑ جواب اپنی دفاعی صلاحیتوں کے اظہار سے دیا ہے۔ دفاعی ماہرین کے مطابق پاکستان کا نصر (ہتف-9) میزائل سسٹم بھارت کی ہر عسکری سازش کا مؤثر توڑ ہے۔ نصر میزائل کم فاصلے تک مار کرنے والا، تیز رفتار اور مکمل طور پر موبائل سسٹم ہے، جو جوہری وارہیڈ لے جانے کی صلاحیت بھی رکھتا ہے۔ اس کی صلاحیت دشمن کے پہلا حملہ ناکام بنانے اور فوری جوابی کارروائی کی بنیاد فراہم کرتی ہے۔
مزید پڑھیں: آپریشن سندور: بھارت نے ہلاک فوجیوں کو اعزازات دے کر اپنی شکست کا اعتراف کرلیا
تجزیہ نگاروں کا کہنا ہے کہ مودی حکومت کی ہندوتوا پر مبنی پالیسی اب نہ صرف بھارت کے اندر بلکہ پورے خطے کے امن کے لیے خطرہ بنتی جا رہی ہے۔ دفاعی مبصرین خبردار کرتے ہیں کہ داخلی ناکامیوں سے توجہ ہٹانے کے لیے جنگی ماحول بنانا صرف بھارت کے سیاسی مفاد میں ہو سکتا ہے، مگر اس کا خمیازہ پورا خطہ بھگت سکتا ہے۔
خطے کے لیے امن و استحکام وقت کی اہم ضرورت ہے، لیکن نیا بھارت کی قیادت بارود کا راگ الاپنے میں مصروف دکھائی دیتی ہے، جو کسی بھی وقت تباہی کی نئی داستان رقم کرسکتی ہے۔
