پاکستان پیپلز پارٹی کے مقامی رہنما اور ٹاؤن چیئرمین فرحان غنی اور ان کے ساتھیوں کے خلاف تھانہ فیروزآباد میں سنگین الزامات کے تحت مقدمہ درج کرلیا گیا ہے۔
مقدمہ حافظ سہیل احمد کی مدعیت میں درج کیا گیا جس میں تعزیراتِ پاکستان کی دفعات 147، 148، 149، 186، 324، 353، 379، 506 اور انسدادِ دہشتگردی ایکٹ کی دفعہ 7 شامل کی گئی ہیں۔
یہ بھی پڑھیں:گلے میں ہار ڈالنے کی کوشش پر سعید غنی نے بزرگ شہری کو جھڑک کر ہار توڑ دیا
ایف آئی آر میں مدعی نے مؤقف اپنایا ہے کہ فرحان غنی اور دیگر ساتھیوں نے ان کی گاڑی کے قریب اپنی گاڑیاں روکیں اور ایک شخص نے قریب بلا کر استفسار کیا کہ ’کس کی اجازت سے زمین کھود رہے ہو؟‘
مدعی کے مطابق انہوں نے اپنا تعارف کرواتے ہوئے بتایا کہ یہ کام تمام اداروں سے این او سی لینے کے بعد کیا جا رہا ہے، تاہم اس وضاحت کے باوجود ملزمان نے بدتمیزی شروع کردی اور کام بند کرنے پر اصرار کیا۔
مدعی کے مطابق جب انہوں نے دوبارہ کہا کہ یہ کام قانونی اجازت کے بعد کیا جا رہا ہے تو ملزمان نے گالم گلوچ اور مارپیٹ شروع کردی۔
دورانِ تشدد ایک شخص نے کہا کہ ’15 پر کال کرکے اسے پولیس کے حوالے کرو‘، جس کے بعد 5 افراد نے اسلحہ تان کر انہیں گھسیٹتے ہوئے قریب واقع ایک پٹرول پمپ پر لے جاکر بند کیا اور مزید مارپیٹ کرتے رہے۔
یہ بھی پڑھیں:پی ٹی آئی نے آصفہ بھٹو کی فتح کو جان بوجھ کر متنازع بنایا، کسی امیدوار کو اغوا نہیں کیا: سعید غنی
ایف آئی آر کے مطابق کچھ دیر بعد پولیس موقع پر پہنچی اور مدعی کو ان افراد سے چھڑایا، تاہم بعد ازاں ملزمان بھی تھانے پہنچے اور پولیس پر دباؤ ڈالا کہ ان کے خلاف کارروائی کی جائے۔ مدعی کے مطابق وہ بعد میں اپنے دفتر اور پھر گھر چلے گئے۔
پولیس ذرائع کا کہنا ہے کہ فرحان غنی کو مقدمے کے اندراج کے بعد گرفتار کرلیا گیا ہے، جبکہ ان کے ساتھیوں قمرالدین، شکیل چانڈیو، سکندر اور روحان کی گرفتاری کے لیے چھاپے مارے جا رہے ہیں۔ مزید تحقیقات جاری ہیں۔
