نائب وزیراعظم و وزیر خارجہ اسحاق ڈار نے او آئی سی وزرائے خارجہ کونسل کے ہنگامی اجلاس کے موقع پر سعودی عرب کے وزیر خارجہ شہزادہ فیصل بن فرحان سے ملاقات کی ہے۔
سماجی رابطے کی سائٹ ’ایکس‘ پر ایک بیان میں اسحاق ڈار نے بتایا کہ سعودی وزیر خارجہ سے ملاقات کے دوران غزہ کی سنگین انسانی صورتحال پر تبادلہ خیال کیا گیا۔
Pleased to meet my brother,
His Highness @faisalbinfarhan, FM of Saudi Arabia, on the sidelines of the #OIC CFM emergency session in Jeddah on Palestine today.We discussed the grave humanitarian situation in Gaza, including the ongoing genocide, famine & the urgent need for a… pic.twitter.com/SJjVXRwxba
— Ishaq Dar (@MIshaqDar50) August 25, 2025
ملاقات میں غزہ میں جاری نسل کشی کے خاتمے، مستقل جنگ بندی کی فوری ضرورت، انسانی امداد کی بلا رکاوٹ فراہمی، تعمیر نو اور پائیدار امن کے اقدامات پر زور دیا گیا۔
فریقین نے برادرانہ دوطرفہ تعلقات کے مختلف پہلوؤں کا بھی جائزہ لیا اور باہمی دلچسپی کے اہم علاقائی و عالمی امور پر تبادلہ خیال کیا۔
واضح رہے کہ جدہ میں ہونے والے او آئی وزرائے خارجہ کونسل کے ہنگامی اجلاس میں وزیر خارجہ اسحاق ڈار نے پاکستان کی نمائندگی کی ہے۔
نائب وزیراعظم و وزیر خارجہ اسحاق ڈار نے اسلامی تعاون تنظیم (او آئی سی) وزرائے خارجہ کونسل کے ہنگامی اجلاس سے خطاب کرتے ہوئے کہاکہ پاکستان اسرائیل کے گریٹر اسرائیل منصوبے کو سختی سے مسترد کرتا ہے کیونکہ یہ امن کے لیے ایک سنگین خطرہ ہے۔
انہوں نے کہا کہ غزہ سے فلسطینیوں کی جبری بے دخلی اور اسرائیل کی جانب سے بین الاقوامی قوانین کی مسلسل خلاف ورزیاں کی جارہی ہیں۔ اسپتالوں، اسکولوں اور پناہ گزین کیمپوں پر حملے کھلی انسانی حقوق کی خلاف ورزیاں ہیں۔ معصوم فلسطینیوں کو دو سال سے مسلسل بربریت کا نشانہ بنایا جارہا ہے۔
یہ بھی پڑھیں: گریٹر اسرائیل کا منصوبہ ناقابل قبول، عالمی برادری غزہ میں غیر مشروط جنگ بندی کرائے: پاکستان
قبل ازیں سعودی عرب کے وزیر خارجہ شہزادہ فیصل بن فرحان نے خطاب کرتے ہوئے کہاکہ اسرائیل کی غزہ میں مسلسل خلاف ورزیاں دو ریاستی حل کے لیے جاری بین الاقوامی کوششوں کو کمزور کررہی ہیں۔
انہوں نے ایک بار پھر اس مؤقف کو دہرایا کہ سعودی عرب 1967 کی سرحدوں کے مطابق فلسطینی ریاست کے قیام کی غیر متزلزل حمایت کرتا ہے۔
