پاکستان تحریک انصاف (پی ٹی آئی) کے بانی عمران خان نے پارٹی کے سیکریٹری جنرل سلمان اکرم راجا کا استعفیٰ منظور کرنے سے انکار کردیا۔
اڈیالہ جیل کے باہر میڈیا سے گفتگو کرتے ہوئے سلمان اکرم راجا نے کہاکہ میرے استعفے پر عمران خان نہیں مانے، ضمنی الیکشن کے حوالے سے سیاسی کمیٹی کا اجلاس آج شام دوبارہ ہوگا، جس میں کوئی فیصلہ کیا جائےگا۔
عمران خان نے میرے استعفے کی منظوری نہیں دی ضمنی الیکشن میں حصہ لینے کے حوالے سے آج شام دوبارہ میٹنگ ہوگی ،سلمان اکرم راجا کی عمران خان سے ملاقات کے بعد گفتگو pic.twitter.com/CZQ0OlOhOC
— WE News (@WENewsPk) August 26, 2025
انہوں نے کہاکہ عمر ایوب اور شبلی فراز عدالتوں میں مقدمات بھگت رہے ہیں، عمران خان نے اپوزیشن لیڈر قومی اسمبلی کے لیے محمود اچکزئی کا نام آج پھر دہرایا ہے۔
واضح رہے کہ گزشتہ روز پی ٹی آئی کے سیکریٹری جنرل سلمان اکرم راجا نے ایک بیان میں کہا تھا کہ وہ عہدے سے الگ ہورہے ہیں، اور اب صرف قانونی معاملات پر اپنی توجہ مرکوز رکھیں گے۔
ان کا کہنا تھا کہ وہ بانی پی ٹی آئی عمران خان سے باضابطہ گزارش کر کے عہدے سے علیحدگی اختیار کریں گے، تاہم بطور وکیل اپنی خدمات بلامعاوضہ پارٹی کے لیے جاری رکھیں گے۔
یہ بھی پڑھیں: سلمان اکرم راجہ کے ساتھ کسی قسم کی تلخ کلامی نہیں ہوئی، علیمہ خان
ان کا مزید کہنا تھا کہ وہ کوئی روایتی سیاست دان، جاگیردار یا صنعتکار نہیں بلکہ ایک عام خاندان سے تعلق رکھتے ہیں، اور اپنے مختصر خاندان کے ساتھ پارٹی کے اندر اور باہر سے ہر طرح کے حملے برداشت کیے ہیں۔ ’آج پیش آنے والے ایک واقعے نے دو ٹوک فیصلے پر مجبور کر دیا ہے کیونکہ میری زندگی کھلی کتاب کی مانند ہے۔‘
