چیف آف آرمی سٹاف جنرل عاصم منیر نے کہا ہے کہ 9 مئی کے بعد ملک میں توڑ پھوڑ کے تمام منصوبہ سازوں، مشتعل افراد اور عوام کو اکسانے والوں کو انصاف کے کٹہرے میں لائیں گے۔
امن کے عمل کوخراب کرنے والوں کی ملک میں کوئی گنجائش نہیں، پاک افواج ملک میں امن و استحکام کے لیے اپنی کوششیں جاری رکھیں گی۔
آرمی چیف جنرل سید عاصم منیر نے کور ہیڈ کوارٹرز پشاور کا دورہ کیا۔ اس موقع پر انہیں موجودہ سیکیورٹی صورتحال اور انسداد دہشت گردی کی جاری کوششوں کے بارے تفصیلی بریفنگ دی گئی۔
انہوں نے دہشت گردی کے خلاف جاری جنگ میں قانون نافذ کرنے والے اداروں کی پیشہ ورانہ قابلیت، کارکردگی اور کامیابیوں کو سراہا۔
آرمی چیف نے کور ہیڈ کوارٹرز کے افسران سے بھی خطاب کیا اور قومی سلامتی کو درپیش خطرات سے نمٹنے کیلئے تیاریوں پربھی زور دیا۔
انہوں نے کہا کہ ’’ہم امن و استحکام کی اپنی کوششیں جاری رکھیں گے اور اس عمل کو خراب کرنے والوں کی ملک میں کوئی گنجائش نہیں ہوگی۔‘‘
انہوں نے کہا کہ مسلح افواج اپنی تنصیبات کے تقدس اور سلامتی کو پامال کرنے یا توڑ پھوڑ کی مزید کسی کوشش کو برداشت نہیں کرے گی
انہوں نے کہا کہ 9 مئی کے یوم سیاہ پر توڑ پھوڑ کے تمام منصوبہ سازوں، مشتعل افراد، اکسانے والوں اور ان پرعمل کرنے والوں کو انصاف کے کٹہرے میں لانے کا عزم کیا ہے۔
آرمی چیف کو یہاں جنگی چیلنجوں اور غلط فہمیاں پیدا کرنے کی کوششوں کے بارے میں بھی آگاہ کیا گیا۔
انہوں نے اس بات پر روشنی ڈالی کہ دشمن عناصر کی جانب سے مسلح افواج کو نشانہ بنانے کے لیے بدنیتی سے بھرپور کوشش کی جا رہی ہے۔
انہوں نے عہد کیا کہ پاکستانی عوام کی حمایت سے ایسی مذموم کوششوں کو ناکام بنایا جائے گا۔
قبل ازیں آمد پر کور کمانڈر پشاور نے آرمی چیف کا بھرپور استقبال کیا۔
