قومی ٹی20 کرکٹ ٹیم کے کپتان سلمان علی آغا نے کہا ہے کہ ہمارا ہدف ایشیا کپ کا ٹائٹل جیتنا ہے، تنقید سے کوئی فرق نہیں پڑتا، ماضی میں پاکستان اور بھارت کے تعلقات زیادہ کشیدہ رہے لیکن اس طرح کی مثال کرکٹ میں کبھی سامنے نہیں آئی۔
قومی ٹیم کے کپتان سلمان علی آغا نے ایشیا کپ کے فائنل سے قبل دبئی میں پریس کانفرنس کرتے ہوئے کہا کہ ہدف صرف اور صرف ٹائٹل جیتنا ہے، میدان میں اسی مقصد کے ساتھ اتریں گے، باہر لوگ کیا کہتے ہیں اس سے کوئی فرق نہیں پڑتا، ہم یہاں اچھی کرکٹ کھیلنے آئے ہیں۔
یہ بھی پڑھیں:محمد رضوان ٹی20 ٹیم کی کپتانی سے فارغ، نئے کپتان سلمان علی آغا ہوں گے، عاقب جاوید
سلمان علی آغا نے کہا کہ فائنل کے لیے پلینگ الیون کا فیصلہ پچ اور کنڈیشنز دیکھ کر ہوگا، چاہے فاسٹ باؤلرز کو کھلائیں یا اسپنرز کو، فیصلہ صورتحال کے مطابق ہی کیا جائے گا۔ ان کا کہنا تھا کہ کھلاڑیوں کو گراؤنڈ میں آزادی حاصل ہے لیکن کسی کی توہین یا ملک کے وقار کے خلاف کوئی عمل برداشت نہیں ہوگا۔
جو ٹیم کم غلطیاں کرتی ہے وہ جیت جاتی ہے اور کل کوشش کریں گے کہ کم غلطیاں کریں ، سلمان علی آغا #PAKvIND #PakistanCricketTeam #CricketJunoon®️ #AsiaCup2025 #thefinale pic.twitter.com/iLxERTXqqY
— CRICKET JUNOON®️ (@Cricktjunoon) September 27, 2025
ہینڈ شیک سے متعلق سوال پر کپتان نے واضح کیا کہ وہ 2007 سے پروفیشنل کرکٹ کھیل رہے ہیں اور آج تک کبھی ایسا نہیں دیکھا کہ ٹیمیں ہاتھ نہ ملائیں۔ ماضی میں پاکستان اور بھارت کے تعلقات زیادہ کشیدہ رہے لیکن اس طرح کی مثال کرکٹ میں کبھی سامنے نہیں آئی۔
ان کا کہنا تھا کہ گراؤنڈ کے باہر کیا ہورہا ہے وہ ہمارے کنٹرول میں نہیں، چاہے میڈیا ہو یا کوئی اور، ہم صرف وہی کنٹرول کرنے کی کوشش کرتے ہیں جو ہمارے بس میں ہے۔ باہر کوئی کچھ بھی بولے، ہمیں فرق نہیں پڑتا، ہمارا مقصد صرف ایشیا کپ جیتنا ہے۔
یہ بھی پڑھیں: ایشیا کپ فائنل: پاکستان کا بدلے کا عزم، بھارت کی ہیٹ ٹرک کی تیاری
بطور بیٹر سب کی ذمہ داری ہے کہ اچھی کرکٹ کھیلیں۔ سلمان علی آغا نے کہا کہ ہوسکتا ہے ہم نے اپنا بہترین کھیل فائنل کے لیے بچا رکھا ہو، کل سب دیکھیں گے۔ انہوں نے کہا کہ اگر اپنی گیم پلان کے مطابق 40 اوورز تک کھیل گئے تو پاکستان کسی بھی ٹیم کو شکست دے سکتا ہے، انشاللہ کل پاکستان کو جیتتے ہوئے دیکھیں گے۔
ایشیا کپ 2025 کا فائنل، بھارت سے ٹکراؤ ، سلمان علی آغا کی اہم باتیں #asiacup2025,#salmanaliagha,#pakvsind,#asiacupfinal,#spinner,#fastbowler pic.twitter.com/oVqNnFPUib
— SPORTSAJTAK (@sportsajtak) September 27, 2025
ٹاس سے متعلق سوال پر کہا کہ اب تک کسی میچ میں ٹاس فیصلہ کن ثابت نہیں ہوا، کل بھی صورتحال یہی ہوگی۔ روایتی فوٹوشوٹ سے متعلق ان کا کہنا تھا کہ ہم اپنا پروٹوکول فالو کریں گے، اگر مخالف ٹیم آئے تو خوشی سے، نہ آئے تو بھی ہمیں کوئی فرق نہیں پڑتا۔
صائم ایوب کے بارے میں سلمان علی آغا نے کہا کہ وہ اگلے 10 سال پاکستان کی نمائندگی کرسکتے ہیں، اس طرح کے کھلاڑیوں کو سپورٹ کرنا ضروری ہے۔ ان کی فیلڈنگ اور باؤلنگ سب نے دیکھی، بیٹنگ میں اب تک نہیں چمک سکے لیکن امید ہے فائنل میں کردار ضرور ادا کریں گے۔
