پاکستان ہاکی فیڈریشن نے بھارت میں ہونے والے جونیئر ہاکی ورلڈ کپ میں شرکت نہ کرنے کا اعلان کیا ہے، فیڈریشن کے مطابق موجودہ سیاسی حالات اس فیصلے کی بنیادی وجہ ہیں۔
پاکستان ہاکی فیڈریشن کے سیکریٹری رانا مجاہد نے ایک بیان میں کہا کہ فیڈریشن نے باضابطہ طور پر انٹرنیشنل ہاکی فیڈریشن کو آگاہ کردیا ہے کہ پاکستان موجودہ حالات میں ٹورنامنٹ میں شرکت نہیں کرے گا۔
یہ بھی پڑھیں: سلطان آف جوہر ہاکی کپ: پاکستان اور بھارت کے درمیان میچ 3-3 گول سے برابر
ان کا کہنا تھا کہ پاکستان نے متبادل تجویز بھی دی ہے کہ ٹیم کے میچز کسی غیر جانب دار مقام پر کھیلے جائیں۔ انہوں نے کہا کہ موجودہ صورتحال میں بھارت جا کر کھیلنا کسی طور مناسب نہیں۔
یہ فیصلہ اسلام آباد اور نئی دہلی کے درمیان حالیہ کشیدگی کے پس منظر میں کیا گیا ہے، جو مئی میں چار روزہ مسلح جھڑپ کے بعد شدت اختیار کر گئی تھی۔ یہ تصادم دونوں ممالک کے درمیان کئی دہائیوں بعد سب سے سنگین لڑائی قرار دیا گیا۔
جھڑپ کا آغاز بھارتی غیر قانونی زیر قبضہ جموں و کشمیر کے علاقے پہلگام میں سیاحوں پر حملے کے بعد ہوا، جس کا الزام بھارت نے پاکستان پر عائد کیا۔ اس واقعے کے بعد بھارت نے پاکستان پر بلااشتعال حملے کیے، جن کے جواب میں پاک فوج نے آپریشن بنیان المرسوس کے تحت جوابی کارروائی کی۔
یہ بھی پڑھیں: پاکستان ہاکی ٹیم بھارت کی مہمان بنے گی یا نہیں؟ پی ایچ ایف عدم شرکت کے ’مبینہ‘ حکومتی فیصلے سے لاعلم
پاکستان نے بھارتی فضائیہ کے 6 طیارے، جن میں 3 رافیل بھی شامل تھے، مار گرائے اور متعدد ڈرونز تباہ کیے۔ دونوں جوہری طاقتوں کے درمیان یہ جھڑپ 87 گھنٹے جاری رہنے کے بعد 10 مئی کو امریکی ثالثی میں طے پانے والے جنگ بندی معاہدے کے ذریعے ختم ہوئی۔
پاکستان ہاکی فیڈریشن اس سے قبل اگست میں بھی ایشیا کپ سے سیکیورٹی خدشات کے باعث دستبردار ہوچکی ہے۔
تنازع کا آغاز اس وقت ہوا جب بھارت نے چیمپئنز ٹرافی کے لیے اپنی ٹیم کو پاکستان بھیجنے سے انکار کردیا، جسے اسلام آباد نے کھیلوں کی سیاست قرار دیا۔ بعدازاں دونوں ممالک کے درمیان ’فیوژن فارمولا‘ طے پایا، جس کے تحت بھارت نے پاکستان کی میزبانی میں ہونے والے ٹورنامنٹ میں کسی غیر جانب دار مقام پر شرکت کی۔
یہ بھی پڑھیں: بھارتی ہاکی ٹیم دورہ پاکستان پر آمادہ، اجازت کا انتظار
پاکستان کو 2023 کے ایشیا کپ کے میچز بھی اسی ہائبرڈ ماڈل کے تحت کرانے پڑے، جس میں بھارت کے میچز اور فائنل سری لنکا میں کھیلے گئے۔ تاہم پاکستان نے 2023 کے کرکٹ ورلڈ کپ کے دوران بھارت میں شرکت کی تھی۔
