امریکی صدر ڈونلڈ ٹرمپ آئندہ ہفتے اپنے ایشیائی دورے کے دوران چین کے صدر شی جن پنگ سے ملاقات کریں گے۔ وائٹ ہاؤس کے مطابق یہ ملاقات جنوبی کوریا میں ہوگی، جو دونوں ممالک کے درمیان بڑھتی تجارتی کشیدگی کے تناظر میں اہم سمجھی جا رہی ہے۔
مزید پڑھیں: دنیا میں نئی صف بندی کی ضرورت، چینی قوم کی نشاۃ ثانیہ کو روکا نہیں جاسکتا، چینی صدر شی جن پنگ
ترجمان کیرولین لیویٹ نے بتایا کہ صدر ٹرمپ جمعہ کی رات ملائیشیا کے لیے روانہ ہوں گے، پھر جاپان کا دورہ کریں گے اور آخر میں جنوبی کوریا پہنچ کر شی جن پنگ سے ملاقات کریں گے۔ ٹرمپ اس موقع پر ایشیا پیسفک اکنامک کوآپریشن (APEC) سمٹ سے بھی خطاب کریں گے۔
یہ ملاقات ایسے وقت میں ہو رہی ہے جب امریکا اور چین کے درمیان تجارتی تنازع ایک بار پھر شدت اختیار کر چکا ہے۔ چین نے حال ہی میں ریئر ارتھ منرلز کی برآمدات پر نئی پابندیاں لگائی ہیں، جس کے جواب میں ٹرمپ نے مزید ٹیرف عائد کرنے کی دھمکی دی تھی۔
صدر ٹرمپ نے تاہم امید ظاہر کی کہ یہ مذاکرات مثبت رہیں گے۔ ان کا کہنا تھا کہ وہ صدر شی سے سب سے پہلے فینٹانائل کی اسمگلنگ پر بات کریں گے، جو امریکا میں اوورڈوز اموات کی بڑی وجہ ہے۔
