مدینہ سے تعلق رکھنے والی 25 سالہ سعودی سائنس کمیونیکیٹر ریام الاحمدی عرب دنیا میں فلکیات کو عام فہم بنانے کے مشن پر ہیں۔ انہوں نے ’ایسٹروفائل‘ (Astrophile) کے نام سے عربی زبان کا پہلا فلکیاتی میگزین متعارف کرایا ہے، جس کا مقصد خلا اور سائنس کو درست، دلچسپ اور روزمرہ گفتگو کا حصہ بنانا ہے۔
ریام الاحمدی نے میڈیا سے گفتگو میں کہا کہ یہ سب میری ذاتی دلچسپی سے شروع ہوا، لیکن وقت کے ساتھ ایک تحریک میں بدل گیا جس کا مقصد عربوں کے سائنسی ورثے کو زندہ کرنا اور نئی نسل کو وہ زبان اور اوزار دینا ہے جن سے وہ اسے دوبارہ دریافت کر سکیں۔
یہ بھی پڑھیے: سائنسدانوں کا 60 سالوں سے زمین کے ساتھ محوِ سفر نیا دریافت کرنے کا دعویٰ، ناسا کی تصدیق
انہوں نے کہا کہ عرب دنیا میں جامع عربی فلکیاتی پلیٹ فارم کی کمی ایک بڑا خلا تھی، جس کی وجہ سے غلط فہمیاں اور غیر مستند معلومات پھیلیں۔ ہم نے یہ خلا پُر کرنے کا فیصلہ کیا۔ ایسٹروفائل صرف بین الاقوامی سائنسی خبریں ترجمہ نہیں کرتا بلکہ انہیں عرب ثقافت اور قاری کے مزاج کے مطابق نئے انداز میں پیش کرتا ہے۔ اس میں کہانی سنانے، جدید ڈیزائن، اور تعلیمی مواد کو ایک ساتھ ملا کر سائنس کو قابلِ فہم اور پُرکشش بنایا گیا ہے۔
ریام کہتی ہیں کپ میرا مقصد ہے کہ قارئین کائنات کی خوبصورتی محسوس کریں، نہ کہ اس کے اعداد و شمار کا بوجھ۔ ان کے بقول، فلکیات اور دیگر پیچیدہ سائنسی مضامین کو عام لوگوں کے دل و دماغ سے جوڑنا ضروری ہے تاکہ سائنس محض لیبارٹریوں تک محدود نہ رہے بلکہ معاشرتی مکالمے کا حصہ بنے۔
الاحمدی کے نزدیک ایسٹروفائل ایک اشاعت نہیں بلکہ احیاء ہے۔ عربوں نے ہی کبھی ستارے نقش کیے تھے، سائنس کو منظم کیا تھا۔ اب ہماری ذمہ داری ہے کہ اس ورثے کو آج کے زمانے کے لیے دوبارہ زندہ کریں۔ یہ میگزین عربی اور انگریزی دونوں زبانوں میں شائع ہوتا ہے، تاکہ سائنسی گفتگو عالمی اور مقامی سطح پر یکساں طور پر آگے بڑھے۔
یہ بھی پڑھیے: پاک ایران سرحد پر سویا ہوا آتش فشاں جاگنے لگا، سائنس دانوں کی وارننگ
ریام تسلیم کرتی ہیں کہ سب سے بڑا چیلنج زبان کا ہے۔ بعض سائنسی اصطلاحات عربی میں موجود ہی نہیں، جیسے راکٹ یا انجینئرنگ سے متعلق الفاظ
یہ مشکل بھی ہے اور موقع بھی، کیونکہ ہم نئی اصطلاحات تخلیق کر سکتے ہیں۔
ایسٹروفائل کی پہچان اب اس کے منفرد اسلوب میں ہے جو سائنسی حقائق کے ساتھ شاعرانہ زبان اور سعودی شناخت کا حسین امتزاج پر مشتمل ہے۔ چند ہی برسوں میں یہ میگزین طلبہ، اساتذہ اور عرب میڈیا کے لیے معتبر حوالہ بن چکا ہے۔
