معروف ہاکی اسٹیڈیم مولانا بھاشانی میں جمعرات کو کھیلے گئے میچ میں افراز اور ندیم احمد نے دو، 2 گول اسکور کیے، جبکہ عماد بٹ، غضنفر علی، وحید اشرف رانا اور حنان شاہد نے ایک، ایک گول کیا۔ بنگلادیش کی جانب سے حزیفہ حسین اور امیرالاسلام نے گول داغے۔
میچ کے آغاز میں میزبان ٹیم نے 3 پاکستانی حملے روکے اور اچھا آغاز کیا، تاہم جلد ہی پاکستان نے برتری حاصل کرلی۔ کپتان عماد بٹ نے چوتھے منٹ میں پنلٹی اسٹروک پر گول کرکے اسکور کھولا۔ اسی دوران بنگلادیش کے گول کیپر رومن سرکار سر پر چوٹ لگنے کے باعث اسٹریچر پر میدان سے باہر لے جائے گئے۔
مزید پڑھیں: پاکستان بنگلہ دیش ہاکی سیریز، قومی ٹیم ڈھاکہ پہنچ گئی
پہلے کوارٹر کے اختتام سے قبل حزیفہ نے ریورس ہٹ کے ذریعے اسکور برابر کیا، مگر 19ویں منٹ میں ندیم نے پاکستان کو دوبارہ برتری دلائی۔ 24ویں منٹ میں افراز نے پنلٹی کارنر پر گول کیا اور 6 منٹ بعد ایک اور خوبصورت فیلڈ گول کے ساتھ پاکستان کی برتری میں اضافہ کر دیا۔
دوسرے ہاف میں بھی پاکستان نے کھیل پر مکمل غلبہ برقرار رکھا اور عمدہ پاسنگ اور فِنِشنگ کی بدولت مزید 4 گول اسکور کیے۔ بنگلادیش کو دوسرے ہاف میں ملنے والے پنلٹی کارنرز میں سے صرف ایک پر کامیابی ملی، جو امیرال نے 58ویں منٹ میں اسکور کیا۔
مزید پڑھیں: سلطان آف جوہر ہاکی کپ: آسٹریلیا نے بھارت کو شکست دے کر ٹائٹل اپنے نام کرلیا
بنگلادیش کے کپتان رضاول کریم بابو نے دفاعی غلطیوں کا اعتراف کرتے ہوئے باقی میچوں میں بہتر کارکردگی کا عزم ظاہر کیا۔
سیریز کا دوسرا میچ جمعہ (آج) اور آخری اتوار کو کھیلا جائے گا، جبکہ مجموعی برتری حاصل کرنے والی ٹیم 2026 ایف آئی ایچ مینرز ورلڈ کپ کے کوالیفائنگ راؤنڈ میں جگہ بنائے گی۔
