این اے 96 فیصل آباد کے ضمنی انتخاب میں ضابطہ اخلاق کی بار بار خلاف ورزیوں پر الیکشن کمیشن نے وزیرِ مملکت برائے داخلہ طلال چوہدری کو 24 نومبر کو ذاتی حیثیت میں طلب کر لیا ہے۔
نوٹس میں طلال چوہدری سے وضاحت طلب کی گئی ہے کہ ان کے خلاف کارروائی کیوں نہ کی جائے اور متعلقہ حلقے سے ان کے امیدوار کو نااہل کیوں نہ قرار دیا جائے۔
یہ بھی پڑھیں: وزیر اعلیٰ خیبرپختونخوا سہیل آفریدی کا دھمکی آمیز بیان، الیکشن کمیشن نے نوٹس لے لیا
الیکشن کمیشن نے مسلم لیگ (ن) کے امیدوار بلال چوہدری کو بھی طلب کیا ہے۔
انہیں نوٹس میں بتایا گیا ہے کہ ان کی انتخابی مہم میں وزیر مملکت طلال چوہدری براہِ راست شریک ہو رہے ہیں، جو ضابطہ اخلاق کی صریح خلاف ورزی ہے، لہٰذا وہ بھی اپنی پوزیشن واضح کریں۔
اسی سلسلے میں ڈسٹرکٹ مانیٹرنگ افسر ڈی جی خان کی جانب سے وفاقی وزیر اویس لغاری اور معاون خصوصی حذیفہ رحمان کو بھی نوٹس جاری کر دیے گئے ہیں۔
مزید پڑھیں:پاکستان الیکشن کمیشن نے پنجاب انتخابات کے لیے ضابطہ اخلاق جاری کردیا
واضح رہے کہ گزشتہ روز ڈسٹرکٹ مانیٹرنگ آفیسر فیصل آباد نے ضابطہ اخلاق کی مسلسل خلاف ورزی پر طلال چوہدری پر 50 ہزار روپے جرمانہ عائد کیا تھا۔
دوسری جانب ڈپٹی مانیٹرنگ آفیسر نے اس حوالے سے رپورٹ بھی الیکشن کمیشن کو ارسال کی تھی۔
