کچے کے علاقے میں دہشتگردوں کے خلاف آپریشن کامیابی سے مکمل کر لیا گیا ہے، آئی جی پنجاب

ترجمان پنجاب پولیس کے مطابق جنوبی پنجاب میں کچے کے علاقے مورو میں ڈاکوؤں کے خلاف آپریشن 45 روز بعد کامیابی سے مکمل کر لیا گیا ہے، پولیس نے علاقے کا مکمل کنٹرول بھی حاصل کر لیا ہے۔

ترجمان پنجاب پولیس کے مطابق کچی مورو میں ڈاکوؤں کی قبضہ گاہوں پر راجن پور پولیس کی جانب سے 3 نئی پولیس چوکیاں قائم کر دی گئی ہیں۔

راجن پور کے 3علاقوں پتن سرکاری، پکٹ عثمان، پکٹ ٹھٹہ پر نئی پولیس چیک پوسٹ، اضافی نفری، مضبوط مورچے اور آبزرویشن ٹاور قائم کر دیے گئے ہیں۔

آر پی او ڈی جی خان کیپٹن (ر) سجاد حسن خان کچہ میں فرنٹ لائن پر جوانوں کے ہمراہ موجود ہیں۔ کچے کا 75 فیصد حصہ دہشت گردوں ڈاکوؤں سے کلئیر کرا لیا گیا ہے، مزید پیش قدمی جاری ہے۔

ترجمان پنجاب پولیس کے مطابق اب تک 7 ڈاکو ہلاک ہوچکے ہیں جبکہ  13 نے سرنڈر کیا،31  کو گرفتار کیا گیا، 9 مغوی بازیاب ہوئے، جب کہ علاقے سے بھاری اسلحہ و ایمونیشن برآمد کیا گیا ہے۔

’ڈاکوؤں کی پناہ گاہوں اور خفیہ ٹھکانوں کو مسمار کرکے علاقے کا مکمل کنٹرول حاصل کر لیا گیا ہے۔‘

آر پی او ڈیرہ غازی خان کے مطابق کچہ مورو سمیت کچہ کے تمام داخلی خارج راستوں پر سخت چیکنگ اور آبی گزرگاہوں کی نگرانی کی جاری ہے۔

آئی جی پنجاب نے  ہدایات جاری کی ہیں کہ ایڈوانس انفارمیشن کی بنیاد پر پولیس کے ٹارگیٹڈ آپریشن اور پیش قدمی کا سلسلہ جاری رکھا جائے۔

آئی جی پنجاب نے کہا کہ نوگو ایریا سمجھے جانے والے دشوار گزار علاقوں میں پولیس جوان نہایت ہمت و بہادری کا مظاہرہ کر رہے ہیں۔