اپوزیشن لیڈر پنجاب اسمبلی معین ریاض قریشی نے صحافیوں سے غیر رسمی گفتگو میں بتایا کہ پی ٹی آئی کے تمام ارکان آج اڈیالہ جیل کے باہر جمع ہوں گے تاکہ پارٹی کے بانی کے ساتھ اظہار یکجہتی کیا جا سکے۔
یہ بھی پڑھیں:’اڈیالہ پہنچو‘: پی ٹی آئی رہنماؤں اور کارکنوں کے لیے اہم ہدایات جاری
معین ریاض قریشی نے کہا کہ اڈیالہ جیل کے باہر پرامن احتجاج تب تک جاری رہے گا جب تک بانی پی ٹی آئی سے ملاقات نہیں کروائی جاتی۔ انہوں نے کہا کہ ہم اپنے قائد کے ساتھ تھے، ہیں اور رہیں گے۔
اپوزیشن لیڈر نے بتایا کہ تمام ارکان پنجاب اسمبلی کچھ دیر بعد اڈیالہ جیل کے باہر پہنچ جائیں گے۔ پی ٹی آئی ارکان اپنے بانی کی بہنوں کے ساتھ بھی اظہار یکجہتی کریں گے۔
معین ریاض قریشی نے کہا کہ پاکستان کے سب سے بڑے صوبے کے اپوزیشن لیڈر کے لیے اپنے قائد سے مشاورت کرنا ضروری ہے، اور اسی مقصد کے لیے ارکان آج جیل کے باہر جمع ہو رہے ہیں۔
