واٹس ایپ نے آئی فون صارفین کے لیے نئی اپ ڈیٹ جاری کر دی ہے، جس کے بعد ایپ کا نیا ورژن 25.37.74 ہو گیا ہے۔ اس اپ ڈیٹ میں گروپ چیٹس کے لیے ایک سادہ اور مفید فیچر شامل کیا گیا ہے۔
اب صارفین گروپ چیٹس میں اپنے نام کے ساتھ ایک چھوٹا سا ٹیگ یا تعارف لکھ سکیں گے، جیسے ایڈمن، منتظم، استاد، ڈاکٹر یا کسی خاص کام سے جڑا کردار۔ یہ ٹیگ چیٹ میں پیغامات کے ساتھ اور گروپ ممبرز کی فہرست میں نظر آئے گا۔
یہ بھی پڑھیں: واٹس ایپ ہیک ہونے پر صارفین کیا کریں؟ سائبر کرائم ایجنسی نے اہم ہدایات جاری کردیں
اس سہولت کے لیے کسی ایڈمن کی اجازت کی ضرورت نہیں ہوگی۔ ہر صارف خود گروپ کی معلومات والے حصے میں جا کر اپنے نام پر ٹیپ کرے گا اور اپنا ٹیگ لکھ سکے گا۔ یہ ٹیگ بعد میں کبھی بھی بدلا جا سکتا ہے۔
واٹس ایپ کے مطابق اس ٹیگ میں صرف سادہ الفاظ لکھے جا سکیں گے، نہ ایموجی لگیں گے اور نہ ہی لنکس شامل ہوں گے۔ اس کا مقصد صرف یہ ہے کہ گروپ کے لوگ آسانی سے سمجھ سکیں کہ کون کس کام یا ذمہ داری سے جڑا ہوا ہے۔
یہ فیچر خاص طور پر بڑے گروپس میں مددگار ثابت ہوگا، جہاں اکثر یہ جاننا مشکل ہو جاتا ہے کہ کون کیا کام دیکھ رہا ہے۔ نیا فیچر چیٹ کو صاف، منظم اور سمجھنے میں آسان بنا دے گا۔
یہ بھی پڑھیں: واٹس ایپ نے فارورڈنگ انٹرفیس کو نیا روپ دے دیا، شیئرنگ مزید آسان
یہ سہولت فی الحال کچھ آئی فون صارفین کو دی جا رہی ہے اور آہستہ آہستہ سب کے لیے دستیاب کر دی جائے گی۔ واٹس ایپ کا کہنا ہے کہ صارفین کے تجربے کو بہتر بنانے کے لیے یہ فیچر مرحلہ وار متعارف کرایا جا رہا ہے۔
