پاکستانی نجی ایئرلائن ایئرسیال کی جانب سے پروازوں کی مسلسل منسوخی کے باعث عمرہ زائرین کو شدید مشکلات کا سامنا ہے۔ لاہور کے علامہ اقبال انٹرنیشنل ایئرپورٹ پر بزرگ، خواتین اور بچوں سمیت درجنوں مسافر گزشتہ 4 دن سے محصور ہیں لیکن تاحال ایئرلائن یا متعلقہ حکام کی جانب سے کوئی مؤثر اقدامات نہیں کیے جا سکے۔
تفصیلات کے مطابق 19 دسمبر کو جدہ روانگی کے لیے پرواز نمبر PF716 کے مسافر مقررہ وقت پر ایئرپورٹ پہنچےمگر اچانک پرواز منسوخ کر دی گئی۔ بعد ازاں 21 دسمبر کو انہی مسافروں کو متبادل پرواز PF726 کے ٹکٹس جاری کیے گئے تاہم یہ پرواز بھی بغیر کسی پیشگی اطلاع کے منسوخ کر دی گئی۔
یہ بھی پڑھیں: کراچی کے بجائے جدہ لے جانے کا معاملہ: سندھ ہائیکورٹ کا ایئر سیال اور ایف آئی اے کو نوٹس
مسافروں کا کہنا ہے کہ ایئرلائن انتظامیہ کی جانب سے نہ تو بروقت معلومات فراہم کی جا رہی ہیں اور نہ ہی کوئی وجہ بتائی جا رہی ہے، کبھی کہتے ہیں جہاز ٹھیک نہیں ہے اور کبھی کہتے ہیں لیٹ ہے۔ ان کا کہنا تھا کہ ہمارا پورا گروپ ائیر پورٹ پر پھنسا ہوا ہے۔
صارفین نے نجی ایئرلائن پر سوالیہ نشان اٹھائے ہیں، صحافی اقرارالحسن نے سوال کیا کہ ہے کوئی ان کو پوچھنے والا؟
ائیرسیال نے چار دن سے عمرے کے مسافروں کو لاہور ائیرپورٹ پر محصور کر دیا۔ بزرگ، خواتین اور بچے رُل گئے۔ 19دسمبر کو PF716 کے مسافر ائیرپورٹ پہنچے تو پرواز منسوخ کر دی گئی۔ 21دسمبر کو PF726 کے ٹکٹ جاری کیے گئے، اسے بھی منسوخ کر دیا گیا۔
کوئی پوچھنے والا ہے؟ pic.twitter.com/s6pfxnKZUe— Iqrar ul Hassan Syed (@iqrarulhassan) December 24, 2025
ایک صارف نے لکھا کہ فیصل آباد اور ڈسکہ کے 40 سے زائد عمرہ زائرین ایئر سیال کی ناقص سروس کے باعث چار دن سے لاہور ائیرپورٹ پر محصور ہیں۔ مسافروں کا کہنا ہے کہ ہر روز بہانے بنا کر انہیں روانہ نہیں کیا جا رہا جس کی وجہ سے بزرگ، خواتین اور بچے شدید مشکلات کا شکار ہیں۔ زائرین نے وزیر اعلیٰ پنجاب اور دیگر متعلقہ حکام سے فوری نوٹس لینے اور کارروائی کرنے کی اپیل کی ہے۔
ائیر سیال کی گھٹیا سروس کے باعث فیصل آباد اور ڈسکہ کے 40 سے زائد عمرہ زائرین لاپور ائیر پورٹ پر محصور ہو گئے۔۔۔ چار دن بعد بھی ائیر سیال عمرہ زائرین کو لیکر روانہ نہ ہو سکی روزانہ کی بنیاد پر بہانے بنا کر زائرین کو ذلیل کیا جا رہا ہے ۔۔ مسافروں کی وزیر اعلی پنجاب سمیت دیگر حکام… pic.twitter.com/kxTHLHHQkf
— صحرانورد (@Aadiiroy2) December 24, 2025
واضح رہے کہ اس سے قبل نجی ایئرلائن ایئرسیال کی ایک حیران کن غفلت نے ایک عام مسافر کو اُس کی منزل کراچی کے بجائے سعودی عرب کے شہر جدہ پہنچا دیا۔
یہ واقعہ اس وقت منظرِ عام پر آیا جب لاہور سے کراچی جانے والے ایک مسافر ملک شاہ زین نے فلائٹ میں 2 گھنٹے بیٹھنے کے بعد سوال کیا کہ ’ہم کراچی کب پہنچیں گے؟‘ جس پر پورا عملہ پریشان ہو گیا۔
یہ بھی پڑھیں: نجی ایئرلائن کی سنگین غفلت، کراچی جانے والا مسافر بنا دستاویز جدہ پہنچا دیا
متاثرہ مسافر ملک شاہ زین کا کہنا ہے کہ ایئرپورٹ پر 2 طیارے کھڑے تھے، اور اسے ایئرسیال کے عملے نے جدہ جانے والی پرواز میں سوار کروا دیا۔ میں نے ٹکٹ ایئرہوسٹس کو بھی دکھایا، مگر کسی نے نہیں بتایا کہ میں غلط فلائٹ پر سوار ہوں۔ میرے پاس نہ پاسپورٹ تھا اور نہ ویزہ، پھر بھی انہوں نے روکنے کی زحمت نہ کی۔
مسافر کے مطابق جب جہاز میں بیٹھے 2 گھنٹے گزر گئے اور منزل پر پہنچنے کا کوئی اشارہ نہ ملا، تو اس نے استفسار کیا جس پر عملے کو معلوم ہوا کہ وہ بین الاقوامی پرواز میں بیٹھا ہے۔
