حکومت کی اصلاحاتی پالیسیوں کے باعث پاکستانی معیشت تیزی سے ترقی کی جانب گامزن ہے اور عالمی سطح پر اس پیش رفت کا اعتراف سامنے آ رہا ہے۔
ملک میں معاشی استحکام کے آثار نمایاں ہو رہے ہیں جبکہ ملکی اور غیر ملکی سرمایہ کاروں کے اعتماد میں اضافہ مثبت معاشی اعشاریوں کی صورت میں ظاہر ہو رہا ہے۔
مزید پڑھیں: بجلی چوروں اور ملکی معیشت کو نقصان پہنچانے والے عناصرکے خلاف ایف آئی اے سرگرم
امریکی جریدے یو ایس اے ٹو ڈے کے مطابق پاکستان نئی بنیادوں پر ترقی کے سفر پر گامزن ہے۔
رپورٹ میں کہا گیا ہے کہ مؤثر اصلاحات اور نجی شعبے میں جدت نے پاکستان کے سرمایہ کاری کے منظرنامے کو تبدیل کر دیا ہے۔
جریدے کے مطابق پاکستان مستحکم ادارہ جاتی نظم و ضبط، بہتر میکرو اکنامک صورتحال اور اہم شعبوں میں مضبوط قیادت کے ساتھ 2026 میں داخل ہو رہا ہے۔
یو ایس اے ٹو ڈے کا کہنا ہے کہ یہ تمام عوامل پاکستان کو طویل مدتی سرمایہ کاری کے لیے ایک مضبوط اور مواقع سے بھرپور مارکیٹ کے طور پر پیش کر رہے ہیں۔
رپورٹ کے مطابق پاکستان کے بینکنگ شعبے نے ڈیجیٹل رجحانات کے تحت صارفین کو جدید سہولیات فراہم کی ہیں جبکہ ٹیکنالوجی اور آؤٹ سورسنگ کا شعبہ بھی بین الاقوامی سطح پر شناخت حاصل کر رہا ہے، جو سرمایہ کاروں کے اعتماد کا ایک اہم ستون بن چکا ہے۔
امریکی جریدے کے مطابق مستحکم توانائی کی فراہمی نے مینوفیکچرنگ، لاجسٹکس اور برآمداتی خدمات میں نئے مواقع پیدا کیے ہیں۔ میکرو اکنامک استحکام میں بہتری کے باعث بڑے مینوفیکچررز آٹوموٹیو صنعت میں سرمایہ کاری کر رہے ہیں، جبکہ ٹیکسٹائل، فرٹیلائزر، پیکجنگ اور ویلیو ایڈڈ فوڈ پروڈکشن جیسے تیزی سے ترقی کرتے شعبوں میں بھی نمایاں پیش رفت دیکھی جا رہی ہے۔
مزید پڑھیں: پاکستان کی معیشت اہم موڑ پر پہنچ چکی، ہم برآمدات پر مبنی ترقی کی جانب بڑھ رہے ہیں، وزیر خزانہ
رپورٹ میں کہا گیا ہے کہ پاکستان میں معدنیات کا شعبہ بھی تیزی سے ابھر رہا ہے، جبکہ ہاؤسنگ مارکیٹ میں اندرونی اور بیرونی سرمایہ کاروں کی دلچسپی میں اضافہ ہو رہا ہے۔ اسی طرح سیاحت اور ہوٹلنگ کے شعبے میں بھی اہم مواقع سامنے آ رہے ہیں۔
یو ایس اے ٹو ڈے کے مطابق پاکستان نجی شعبے کے ساتھ مل کر طویل مدتی ترقی کی بنیادیں مضبوط کر رہا ہے، جہاں نجی شعبہ زیادہ مستحکم، ٹیکنالوجی سے ہم آہنگ اور عالمی تقاضوں کے مطابق ہوتا جا رہا ہے۔
