بھارت میں وجے ہزارے ٹرافی کے پلیٹ گروپ میچ میں بدھ کے روز بہار نے ڈومیسٹک کرکٹ کی تاریخ میں سب سے زیادہ رنز اسکور کرکے ریکارڈ بنا ڈالا۔
اروناچل پردیش کے خلاف بہار کے بلے بازوں نے دھواں دار بیٹنگ کرتے ہوئے 6 وکٹوں کے نقصان پر 574 رنز بنا کر لسٹ اے کرکٹ کا عالمی ریکارڈ قائم کر دیا۔ یہ مقابلہ یکطرفہ ثابت ہوا جس میں بہار نے ٹاس جیت کر پہلے بیٹنگ کا فیصلہ کیا اور سازگار کنڈیشنز کا بھرپور فائدہ اٹھایا۔
یہ بھی پڑھیے: وسیم اکرم کا ریکارڈ ٹوٹ گیا، مچل اسٹارک ٹیسٹ کرکٹ میں سب سے کامیاب لیفٹ آرم فاسٹ باؤلر بن گئے
اس تاریخی اننگز کے ہیرو 14 سالہ نوجوان ویبھو سوریہ ونشی اور کپتان ثاقب الغنی رہے، جنہوں نے برق رفتار سنچریاں اسکور کیں۔ ویبھو سوریہ ونشی نے صرف 36 گیندوں پر سنچری مکمل کر کے بھارتی لسٹ اے کرکٹ کی دوسری تیز ترین سنچری بنائی، جبکہ 59 گیندوں پر 150 رنز مکمل کر کے اے بی ڈی ویلیئرز کا عالمی ریکارڈ بھی توڑ دیا۔
اوپنر ویبھو سوریہ ونشی نے 84 گیندوں پر شاندار 190 رنز بنائے، جس میں 16 چوکے اور 15 چھکے شامل تھے۔ ان کی اسٹرائیک ریٹ 226 سے زائد رہی۔ یہ ان کے کیریئر کی پہلی نان ٹی20 سنچری اور صرف 7ویں لسٹ اے اننگز تھی۔
دوسری جانب کپتان ثاقب الغنی نے صرف 40 گیندوں پر 128 رنز کی تباہ کن اننگز کھیلی اور 32 گیندوں پر سنچری بنا کر بھارتی لسٹ اے کرکٹ کی تیز ترین سنچری کا ریکارڈ اپنے نام کر لیا۔ انہوں نے انمول پریت سنگھ کا 35 گیندوں پر سنچری کا ریکارڈ بھی توڑ دیا۔
یہ بھی پڑھیے: شاہین شاہ آفریدی نے ون ڈے کرکٹ میں نیا عالمی ریکارڈ اپنے نام کرلیا
وکٹ کیپر بلے باز آیوش لوہارُکا نے بھی 56 گیندوں پر 116 رنز کی شاندار اننگز کھیلی۔ میچ میں مجموعی طور پر 49 چوکے اور 38 چھکے لگے۔
بہار نے تمل ناڈو کا 506 رنز کا پچھلا ریکارڈ توڑ دیا، جو 2022-23 میں اروناچل پردیش کے خلاف بنا تھا۔
ادھر ایک اور میچ میں ایشان کشن نے بھارتی ٹیم میں واپسی کو یادگار بناتے ہوئے جھارکھنڈ کی جانب سے کرناٹک کے خلاف 33 گیندوں پر سنچری اسکور کی اور 39 گیندوں پر 125 رنز بنا کر ٹیم کو 412/9 کے بڑے اسکور تک پہنچایا۔
