نائجیریا کی شمال مشرقی ریاست بورنو کے دارالحکومت میدوگوری میں واقع گامبورو مارکیٹ کی ایک مسجد میں بدھ کی شام بم دھماکے کے نتیجے میں کم از کم 7 افراد جاں بحق ہو گئے۔ عینی شاہدین اور سیکیورٹی ذرائع کے مطابق دھماکا اس وقت ہوا جب مسجد میں مغرب کی نماز کے لیے بڑی تعداد میں نمازی موجود تھے۔
مزید پڑھیں:انڈونیشیا: نماز جمعہ کے دوران مسجد میں زور دار دھماکا، 54 شہری زخمی
پولیس نے دھماکے کی تصدیق کرتے ہوئے بتایا کہ بم ڈسپوزل ٹیم موقع پر موجود ہے، تاہم تاحال کسی گروہ نے حملے کی ذمہ داری قبول نہیں کی۔ بعض عینی شاہدین کے مطابق بم مسجد کے اندر نصب تھا، جبکہ کچھ نے خودکش حملے کا خدشہ ظاہر کیا ہے۔
مزید پڑھیں:خیبر کی مسجد میں دھماکا، حملہ آور کے تانے بانے اہم پڑوسی ملک سے ملنے لگے
جاں بحق افراد کی حتمی تعداد اور زخمیوں کی تفصیل تاحال جاری نہیں کی گئی، تاہم متعدد زخمیوں کو اسپتال منتقل کیا گیا ہے۔ میدوگوری ماضی میں شدت پسند تنظیم بوکوحرام اور داعش کے حملوں کا مرکز رہا ہے، اگرچہ حالیہ برسوں میں شہر نسبتاً پُرامن تھا۔
