کور کمانڈر ہاؤس حملے میں ملوث ملزمان کو کمانڈنگ افسر کے حوالے کرنے کا حکم

لاہور کی انسداد دہشتگری عدالت نے کور کمانڈر ہاؤس (جناح ہاؤس) حملہ کیس میں توڑ پھوڑ اور جلاؤ گھیراؤ کے 16 ملزمان کو آرمی ایکٹ کے تحت ٹرائل کے لیے کمانڈنگ افسر کے حوالے کرنے کا حکم دے دیا۔

انسداد دہشتگردی عدالت لاہور میں کور کمانڈر ہاؤس میں جلاؤ گھیرا اور توڑ پھوڑ کے کیس کی سماعت ہوئی جس میں کمانڈنگ افسرنے آرمی ایکٹ کے تحت ٹرائل کے لیے 16 شرپسندوں کی حراست مانگی۔

عدالت نے کمانڈنگ افسر کی اپیل پر فیصلہ محفوظ کیا اور کچھ دیر بعد کمانڈنگ افسر کی استدعا منظور کرلی۔

عدالت نے سابق ایم پی اے میاں اکرم عثمان سمیت 16 شرپسندوں کو کمانڈنگ افسر کے حوالے کرنے کا حکم دیا۔

لاہور اے ٹی سی نے اپنے فیصلے میں کہا کہ ایس پی کیمپ جیل 16 ملزمان کو مزید کارورائی کے لیے کمانڈنگ افسر کے حوالے کرے، کمانڈنگ افسر کے مطابق ملزمان آفیشل ایکٹ کے سیکشن 3،7 اور 9 کے تحت قصور وار پائے گئے ہیں۔

عدالتی فیصلے میں کہا گیا کہ کمانڈنگ افسر کے مطابق ملزمان کے خلاف آرمی ایکٹ کے تحت ٹرائل ہوسکتا ہے اوراب ملزمان کے خلاف مزید کارروائی آرمی ایکٹ 1952 کے تحت ہوگی۔