پاکستان تحریک انصاف (پی ٹی آئی) کے بانی عمران خان سے آج جیل میں ملاقات کا دن ہے، تاہم ابھی تک ان کی بہنوں سمیت کسی کو بھی ملاقات کی اجازت نہیں ملی، جس کے خلاف علیمہ خان اور دیگر نے جیل کے قریب دھرنا دے دیا ہے۔
چیئرمین عمران خان کی بہنوں اور صوبائی کابینہ کے اراکین کے ہمراہ اڈیالہ جیل کے باہر موجود۔#ReleaseImranKhan pic.twitter.com/Me5EB2twoG
— Syed Fakhar Jehan (@fakharebuner) January 6, 2026
اڈیالہ روڈ فیکٹری ناکے پر علیمہ خان کی قیادت میں پی ٹی آئی کارکنان کا دھرنا جاری ہے، جہاں ان کی بہنیں نورین نیازی اور عظمیٰ خان بھی موجود ہیں۔ دھرنے میں کارکنان کی جانب سے شدید نعرے بازی کی جا رہی ہے جبکہ متعدد پارٹی رہنما بھی احتجاج میں شریک ہیں۔
واضح رہے کہ آج عمران خان اور بشریٰ بی بی سے اڈیالہ جیل میں ملاقات کا دن تھا، جس کے باعث پی ٹی آئی کارکنان گورکھپور ناکا پہنچنا شروع ہو گئے تھے۔ صورتحال کے پیش نظر پولیس کی بھاری نفری تعینات کی گئی اور اڈیالہ جیل جانے والے راستوں پر پانچ مقامات پر ناکے لگا کر سڑکیں بند کردی گئیں۔
اسی دوران فیکٹری ناکے پر پی ٹی آئی کارکنان نے قرآن خوانی کی۔ راولپنڈی پولیس کی جانب سے دھرنے کی جگہ پر پانی کا ٹینکر لا کر پانی چھوڑ دیا گیا، جس سے علاقہ زیرِ آب آ گیا اور مظاہرین کو مجبوراً جگہ تبدیل کرنا پڑی، بعد ازاں پولیس نے ٹینکر وہاں سے ہٹا لیا۔
بعد میں عمران خان سے ملاقات کا وقت ختم ہو گیا تاہم بانی پی ٹی آئی عمران خان کی بہنوں سمیت کسی بھی رہنما کو ملاقات کی اجازت نہ مل سکی۔
دھرنے میں سلمان اکرم راجا، عون عباس بپی، شاندانہ گلزار، نعیم پنجوتھا، مینا خان آفریدی اور شوکت بسرا سمیت دیگر رہنماؤں نے شرکت کی، جبکہ اب نامزد اپوزیشن لیڈر قومی اسمبلی محمود اچکزئی اور علامہ راجا ناصر عباس بھی پہنچ گئے ہیں۔
تحریک تحفظ آئین کے سربراہ محمود خان اچکزئی اور سینیٹر علامہ راجہ ناصر عباس اڈیالہ جیل دھرنے میں پہنچ گئے۔ pic.twitter.com/Lc2QlNxqNw
— Shabbir Dar (@ShabbirDar5) January 6, 2026
یاد رہے کہ اس سے قبل 3 بار عمران خان کی بہنوں اور پی ٹی آئی کارکنان کو دھرنا دینے پر واٹر کینن کا استعمال کرکے منتشر کیا جا چکا ہے۔
