سینیئر سیاستدان، سابق سینیٹر مشتاق احمد خان نے ایک نئی سیاسی جماعت ’پاکستان رائٹس موومنٹ‘ کے قیام کا اعلان کردیا۔
اسلام آباد میں منعقدہ تقریب کے دوران سیاسی رہنماؤں، کارکنان، رفقا اور سول سوسائٹی کے نمائندوں کی بڑی تعداد شریک ہوئی۔
مزید پڑھیں: پرویز خٹک نئی جماعت یا علیحدہ دھڑا کیوں بنانا چاہتے ہیں؟
تقریب سے خطاب کرتے ہوئے مشتاق احمد خان کا کہنا تھا کہ پاکستان رائٹس موومنٹ 1973 کے آئین کے تحت کام کرے گی، جو حاکمیتِ اعلیٰ اللہ تعالیٰ کو تسلیم کرتا ہے اور اسلامی اصولوں کی ضمانت دیتا ہے۔
جماعت اسلامی کو خیر آباد کہنے والے مشتاق احمد نے نئی سیاسی جماعت پاکستان رائٹس موومنٹ کی بنیاد رکھ دی ، پاکستان رائٹس موومنٹ ایک اسلامی، جمہوری، عوامی، انقلابی، مزاہمتی جماعت اور تحریک ہو گی، سابق سینیٹر مشتاق احمد pic.twitter.com/M4yvMbZLjs
— WE News (@WENewsPk) January 10, 2026
انہوں نے کہاکہ موجودہ معاشرتی نظام میں عام شہری اپنے بنیادی حقوق سے محروم ہے، اسی لیے جماعت کا منشور تمام شہریوں کو برابری کی بنیاد پر سہولیات اور حقوق کی فراہمی پر مرکوز ہوگا۔
انہوں نے بتایا کہ جماعت کا مقصد چند مخصوص طبقات کی اجارہ داری کا خاتمہ، سماجی اور معاشی انصاف کا قیام، فوری اور سستا انصاف، آزادیٔ اظہار کا تحفظ، تعلیم اور صحت کی سہولیات کی فراہمی، غربت اور کرپشن کے خاتمے کے ساتھ ساتھ ماورائے عدالت قتل اور ملٹری آپریشنز کے سلسلے کو روکنا ہے۔ ان کے مطابق وفاقی اکائیوں کے درمیان اعتماد کی بحالی بھی پارٹی کی ترجیحات میں شامل ہے۔
سابق سینیٹر مشتاق احمد نے موجودہ پارلیمانی نظام پر تنقید کرتے ہوئے اسے غیر مؤثر قرار دیا اور کہا کہ ملک میں صحافت اور اظہارِ رائے پر قدغنیں عائد ہیں، جبکہ بےروزگاری، مہنگائی، غذائی عدم تحفظ، منشیات، ماحولیاتی آلودگی اور کرپشن جیسے مسائل شدت اختیار کر چکے ہیں۔
مشتاق احمد خان نے اشرافیہ کی اجارہ داری، آئی پی پیز کو کی جانے والی ادائیگیوں، نوجوانوں کی بدحالی اور انسانی اسمگلنگ پر بھی تشویش کا اظہار کیا۔
مزید پڑھیں: اقرار الحسن کا نئی سیاسی جماعت بنانے کا اعلان، پارٹی کب اور کیوں بنائی جارہی ہے، تاریخ بھی بتادی
ان کا کہنا تھا کہ دہشتگردوں کے خلاف کسی بھی آپریشن سے قبل عوام، پارلیمان اور علاقائی جرگوں کو اعتماد میں لیا جانا چاہیے۔
انہوں نے مطالبہ کیاکہ ملک کو درست سمت دینے کے لیے باصلاحیت اور دیانتدار قیادت کو آگے لایا جائے۔
