امریکا نے وینزویلا کے ساتھ طے پانے والے 2 بلین ڈالر کے معاہدے کے تحت پہلی بار وینزویلا کے تیل کی فروخت مکمل کر لی ہے، جس کی مالیت تقریباً 500 ملین ڈالر ہے اور رقم امریکی کنٹرول والے بینک اکاؤنٹس میں رکھی گئی ہے۔
یہ بھی پڑھیں:امریکا نے وینزویلا سے روانہ ہونے والا ایک اور تیل بردار جہاز ضبط کرلیا
امریکی عہدیدار نے بین الاقوامی خبر رساں ادارے کو بتایا ہے کہ وینزویلا کے تیل کی پہلی فروخت معاہدے کا حصہ ہے جو حال ہی میں واشنگٹن اور کاراکاس کے درمیان طے پایا تھا۔ مزید فروخت آنے والے دنوں اور ہفتوں میں متوقع ہے۔
ابتدائی فروخت سے حاصل ہونے والی آمدنی، جس کی مالیت تقریباً 500 ملین ڈالر ہے ، امریکی حکومت کے زیرِ انتظام بینک اکاؤنٹس میں رکھی جا رہی ہے، جس کے بارے میں ایک انتظامی عہدیدار نے بتایا کہ یہ رقم جمع کرنے کے لیے ایک خصوصی حکم جاری کیا گیا تھا۔
ذرائع کے مطابق اس رقم کا مرکزی اکاؤنٹ قطر میں واقع ہے، جسے ایک غیرجانبدار مقام کے طور پر منتخب کیا گیا ہے جہاں فنڈز امریکی منظوری کے ساتھ بغیر ضبط کیے منتقل ہو سکتے ہیں۔
یہ فروخت وینزویلا اور امریکا کے درمیان تیل کے شعبے میں تعلقات میں ایک اہم پیش رفت کی علامت ہے، اور اس کے بعد مزید تجارتی سرگرمیوں کی توقع ظاہر کی جا رہی ہے۔
