پاکستان ٹیلی کیمونی کیشن اتھارٹی نے نوٹس کے اجرا کے باوجود توہین آمیز مواد نہ ہٹانے پر وکی پیڈیا کی سروس کو محدود کرتے ہوئے آن لائن انسائکلوپیڈیا کو متنبہ کیا ہے کہ تعمیل میں مزید تاخیر کی صورت میں اسے پاکستان میں بلاک کردیا جائے گا۔
پی ٹی اے کی جانب سے بدھ کو جاری کردہ اعلامیہ میں کہا گیا ہے کہ قابل اطلاق قانون اور عدالتی حکم کے تحت نوٹس جاری کر کے توہین آمیز مواد کو ہٹانے یا بلاک کرنے کے لیے وکی پیڈیا سے رابطہ کیا گیا تھا لیکن عدم تعمیل کے پیش نظر مذکورہ پلیٹ فارم کی سروس کو 48 گھنٹوں کے لیے ڈی گریڈ کر دیا گیا ہے۔
اعلامیہ میں کہا گیا کہ وکی پیڈیا کو سماعت کا موقع فراہم کیا گیا تاہم نہ تو توہین آمیز مواد ہٹانے کے حکم کی تعمیل کی گئی اور نہ ہی ان کا کوئی ذمہ دار اتھارٹی کے سامنے پیش ہوا۔
پی ٹی اے نےکہا ہے کہ وکی پیڈیا کی جانب سے توہین آمیز مواد بلاک کیے جانے یا ہٹائے جانے کی صورت میں اس کی سروس پر سے پابندی اٹھانے پر غور کیا جاسکتا ہے بصورت دیگر یہ پلاٹ فارم ملک میں مکمل بلاک کردیا جائے گا۔
