بلوچستان میں فتنہ الہندوستان کی دہشتگرد کارروائیوں کا نشانہ معصوم بلوچ عوام بن گئے، جس سے دہشتگردوں کی بربریت ایک بار پھر کھل کر سامنے آ گئی۔
مزید پڑھیں: بلوچستان: سیکیورٹی فورسز نے بھارتی حمایت یافتہ دہشتگردوں کے حملے ناکام بنا دیے، 108 ہلاک، 10 جوان شہید
فتنہ الہندوستان سے وابستہ دہشتگردوں نے لیبر کالونی گوادر میں نہتے اور بے گناہ شہریوں پر حملہ کیا، جس میں معصوم بلوچ عوام کو بے رحمی سے نشانہ بنایا گیا۔
جی ڈی اے اسپتال گوادر میں زیرِ علاج زخمی بلوچ شہریوں نے بتایا کہ دہشتگردوں نے بلا امتیاز نہتے اور بے قصور افراد پر حملہ کیا۔
زخمی شہریوں کے مطابق حملہ انتہائی بزدلانہ اور سفاک تھا، جس میں خواتین اور بچوں کو بھی نہیں بخشا گیا۔
زخمی بلوچ شہریوں کا کہنا ہے کہ دہشتگردوں کے سامنے قرآن اور بچوں کا واسطہ بھی دیا گیا، مگر حملہ آوروں نے کسی کی ایک نہ سنی۔ ان کے مطابق دہشتگردوں کا مقصد صرف خوف و ہراس، خونریزی اور بدامنی پھیلانا تھا۔
زخمی شہریوں نے دہشتگردوں کی درندگی اور انسانیت سوز رویے کا آنکھوں دیکھا حال بیان کیا۔
دوسری جانب بلوچستان میں سیکیورٹی فورسز کے بروقت اور مؤثر ردعمل کے باعث فتنہ الہندوستان کا یہ حملہ ناکام بنا دیا گیا اور ایک بڑا سانحہ ٹل گیا۔
مزید پڑھیں: بلوچستان: سی ٹی ڈی کی مستونگ میں کارروائی، 5 دہشتگرد ہلاک
دہشت گردوں کے اس حملے میں 11 معصوم بلوچ شہری شہید ہوئے، جن میں خواتین اور بچے بھی شامل ہیں، جبکہ دو روز میں اب تک 108 دہشتگردوں کو ہلاک کیا جا چکا ہے۔
