مشہور ٹیلی وژن اداکارہ روپالی گنگولی کا مقبول ڈرامہ سیریل انوپما ایک بار پھر خبروں کی زینت بن گیا ہے۔ اس بار وجہ شو کا ایک جذبات سے بھرپور منظر ہے جس میں روپالی گنگولی کے مکالمے نے سوشل میڈیا پر طوفان برپا کر دیا۔
وائرل ہونے والے اس منظر میں روپالی گنگولی، راجنی کے کردار میں نظر آنے والی اداکارہ رنکو دھون کے ساتھ شدید لفظی تصادم میں دکھائی دیتی ہیں۔ منظر کے دوران روپالی کا طویل اور جارحانہ مکالمہ ناظرین کی توجہ کا مرکز بن گیا خاص طور پر ان کا جملہ ’گھما گھما کے ماروں گی‘ سوشل میڈیا صارفین کو بالی ووڈ اداکار سنی دیول کی یاد دلا گیا۔
View this post on Instagram
وائرل ویڈیو میں اداکارہ کہتی ہیں کہ ’ماروں گی تجھے بالوں سے پکڑ کر، چوٹی سے گھسیٹ کر بیچ بازار لا کر ماروں گی۔ تجھے گھما گھما کر ماروں گی، گرا گرا کر ماروں گی، دوڑا دوڑا کر ماروں گی، بھگا بھگا کر ماروں گی، سینڈل توڑ کر ماروں گی، دونوں ہاتھوں سے ماروں گی۔ ہاتھ تھک گئے تو لاتوں سے ماروں گی اور اگر پیر تھک گئے تو باتوں سے ماروں گی۔ اتنا ماروں گی کہ درد بھی کنفیوز ہو جائے گا کہ کس کس ہڈی پر، کس کس چوٹ پر دھیان دے۔ بہت ماروں گی‘۔
سوشل میڈیا پر کئی صارفین نے اس منظر کا موازنہ سنی دیول کے مشہور ایکشن مناظر سے کیا جبکہ ایک صارف نے مزاحیہ انداز میں روپالی گنگولی کو ’سنی دیول الٹرا پرو میکس‘ قرار دیا۔ منظر وائرل ہوتے ہی میمز اور دلچسپ تبصروں کی بھرمار ہو گئی۔ ایک صارف کا کہنا تھا ’ ماروں گی کے 50 شیڈز‘۔
کچھ صارفین نے اس منظر کو گھریلو حالات سے جوڑتے ہوئے لکھا ’میری ماں جب ریاضی کے امتحان میں نمبر کم آ جائیں‘ اور ’میری بہن جب اسے پتا چلے کہ میں نے اس کا شیمپو استعمال کر لیا ہے‘۔
جب ایک مداح نے اس منظر میں ان کی شاندار اداکاری کی تعریف کی تو روپالی نے ایکس پرلکھا کہ یہ مناظر لگاتار شوٹ کیے جاتے ہیں اور وہ بھی دو مختلف یونٹس میں تقریباً ایک ہی وقت پر۔ یہ سوچنے کا وقت ہی نہیں ہوتا کہ میں تھکی ہوں یا نہیں، بس اپنا کام کرتے جاؤ۔ رائٹرز، ایڈیٹرز، ڈائریکٹرز، ڈی او پی اور اسسٹنٹ ڈائریکٹرز بہت مدد کرتے ہیں، یہ سب ٹیم ورک ہے۔ جب وہ لوگ نہیں تھکتے تو میں کیسے تھک جاؤں؟
These scenes r literally done back to back and two different scenes in two different units almost simultaneously…. Where is the time to think if I m tired or drained out … bas karm karte jao … the writers editors directors and DOP and the ADs help so so so much … team effort… https://t.co/7eW3YZpowr
— Rupali Ganguly (@TheRupali) January 28, 2026
واضح رہے کہ انوپما جو پہلی بار 2020 میں نشر ہوا، بنگالی سیریل سریموئی کا آفیشل ہندی ریمیک ہے۔ اس شو میں مرکزی کردار ادا کرنے کے بعد روپالی گنگولی نے ایک نئی فین فالوئنگ حاصل کی۔
