راجپال یادو اور امیتابھ بچن کے تعلقات کا چیک باؤنس کیس میں انکشاف

بالیوڈ اداکار راجپال یادو کو دہلی ہائی کورٹ نے 9 کروڑ روپے کے چیک باؤنس کیس میں عبوری ضمانت دے دی ہے۔ وکیل کے مطابق یہ تنازع فلم اٹا پٹا لاپٹا کے میوزک لانچ کے موقع پر امیتابھ بچن کے شامل ہونے والے ایک اختلاف سے شروع ہوا اور تب سے قانونی جنگ جاری ہے۔

یہ بھی پڑھیں:راجپال یادو کی جیل سے رہائی کی ویڈیو وائرل، حقیقت سامنے آگئی

راجپال یادو نے دہلی ہائی کورٹ سے عبوری ضمانت حاصل کر لی ہے، یہ کیس کاروباری شخصیت مدھو گوپل اگروال کی طرف سے دائر کیا گیا تھا، جس میں 9 کروڑ روپے کے چیک باؤنس کا الزام شامل ہے۔ وکیل بھاسکر اپادھیائے کے مطابق یہ تنازعہ 2012 میں فلم اٹا پٹا لاپٹا کے میوزک لانچ کے دوران ایک اختلاف سے شروع ہوا، جس میں امیتابھ بچن بھی موجود تھے۔

مذکورہ وکیل کے مطابق اگروال نے راجپال کو فلم کی تیاری کے لیے 5 کروڑ روپے قرض دیے تھے اور اس کے بعد کئی معاہدے طے پائے۔ آخری معاہدے کے تحت راجپال نے 5 چیک جاری کیے تھے جو دسمبر 2012 سے پیش کیے جانے تھے۔

میوزک لانچ کے دن راجپال کی ٹیم نے اس بات کی مخالفت کی کہ اگروال اسٹیج پر امیتابھ بچن کے ساتھ شریک ہوں، جس سے اگروال ناراض ہو گئے اور عدالت کا دروازہ کھٹکھٹا دیا۔ بعد میں ایک رضامندی معاہدہ طے پایا جس کے تحت پچھلے تمام معاہدے منسوخ کر دیے گئے۔

2016 میں ایک نیا رضامندی معاہدہ منظور ہوا، جس کے تحت 10.40 کروڑ روپے کی رقم ادا کی جانی تھی۔ راجپال نے جزوی طور پر 1.90 کروڑ روپے ادا کیے اور دیگر ضمانت دہندگان نے رقم کی واپسی کے لیے جائیداد پیش کی، مگر شکایت کنندہ نے رقم قبول کرنے سے انکار کر دیا۔

یہ بھی پڑھیں:کروڑوں روپے کمانے والے راجپال یادیو کنگال کیسے ہوگئے؟

راجپال کے وکیل کا کہنا ہے کہ عدالت میں معاملہ اب بھی زیر التوا ہے اور عبوری ضمانت ملنے کے باوجود قانونی جنگ جاری ہے، اور ان کا موقف عدالت میں مکمل طور پر سنا جانا باقی ہے۔