وزیراعظم پاکستان کے مشیر برائے سیاسی امور رانا ثنااللہ نے کہا ہے کہ عمران خان رہائی فورس بنانا پی ٹی آئی کو بہت نقصان پہنچائے گا، تحریک انصاف کے لیے کسی قسم کی ڈیل یا ڈھیل دستیاب نہیں ہے۔
مزید پڑھیں: ’عمران خان رہائی فورس‘ کے قیام میں اب تک کیا پیشرفت ہوئی؟
نجی ٹی وی سے گفتگو کرتے ہوئے انہوں نے کہاکہ پی ٹی آئی سیاسی جماعت کا رویہ اپنائے اور پارلیمنٹ میں کردار ادا کرے، اگر یہ لوگ اسی راستے پر چلتے رہے تو نقصان اٹھائیں گے۔
رانا ثنااللہ نے کہاکہ اسٹیبلشمنٹ نے تو تحریک انصاف سے بات نہیں کرنی، انہوں نے واضح کہا ہے کہ سیاستدان آپس میں بات کریں۔
انہوں نے دعویٰ کیاکہ پی ٹی آئی نے زور لگایا ہے کہ 2018 کی طرح انہیں دوبارہ ایوان تک پہنچایا جائے۔
مشیر وزیراعظم نے کہاکہ بالآخر تحریک انصاف سے سیاستدانوں نے ہی بات کرنی ہے، اور سیاسی سائیڈ پر تحریک انصاف کے لیے ہماری آفر موجود ہے۔
ایک سوال کے جواب میں رانا ثنااللہ نے کہاکہ رہائی فورس ٹوٹل فیلیئر ہوگا اور تحریک انصاف کے لیے بہت نقصان دہ ہوگا، اگر تحریک انصاف نے اپنا رویہ نہ بدلا تو یہ پاکستانی سیاست میں اپنا وجود کھو دیں گے۔
واضح رہے کہ وزیراعلیٰ خیبرپختونخوا سہیل آفریدی نے عمران خان کی رہائی کے لیے فورس بنانے کا اعلان کیا ہے، جس کا باقاعدہ حلف ہوگا، اور سہیل آفریدی کے مطابق یہ فورس لاکھوں افراد پر مشتمل ہوگی۔
مزید پڑھیں: عمران خان کی رہائی کے لیے پی ٹی آئی کی مہم کیا رمضان میں چھٹی پر چلی گئی؟
دوسری جانب چیئرمین پی ٹی آئی بیرسٹر گوہر نے کہا ہے کہ عمران خان رہائی فورس کے معاملے پر پارٹی میں بات ہوگی، کیوں کہ پارٹی کسی کسی ملیشیا پر یقین نہیں رکھتی، ہم اپنی جمہوری جدوجہد جاری رکھیں گے۔
