برطانوی ہائی کمیشن اسلام آباد نے اعلان کیا ہے کہ پاکستانی شہری اب برطانیہ کے لیے مکمل ڈیجیٹل ویزا (eVisa) سسٹم استعمال کر سکیں گے، جس سے پاسپورٹ پر ویزا اسٹیکر کی ضرورت ختم ہو گئی اور ویزا درخواست کا عمل آسان ہو گیا ہے۔
مزید پڑھیں:جرمن فیملی ری یونین ویزا: ڈیجیٹل نظام کا نفاذ امیدواروں کے لیے حوصلہ افزا لیکن کچھ لوگ پریشان کیوں؟
نئے نظام کے تحت سیاح، کاروباری افراد اور اہلخانہ سے ملاقات کے لیے آنے والے درخواست گزار آن لائن درخواست دیں گے اور بائیومیٹرک معلومات فراہم کرنے کے لیے ویزا اپلیکیشن سینٹر جائیں گے۔ تاہم، کامیاب درخواست گزار اب اپنے پاسپورٹ واپس لینے کے بجائے الیکٹرانک طور پر eVisa کے ذریعے امیگریشن اسٹیٹس کی تصدیق حاصل کریں گے۔
ای ویزا ایک محفوظ ڈیجیٹل ریکارڈ فراہم کرتا ہے جو UK Visas and Immigration کے آن لائن اکاؤنٹ کے ذریعے دستیاب ہوگا۔ اس سے درخواست گزار کو پاسپورٹ کی دوسری بار ضرورت نہیں ہوگی اور انتظار کے وقت اور لاجسٹک مشکلات کم ہوں گی۔
ہائی کمشنر جین میریٹ نے کہا کہ یہ اقدام پاکستانی شہریوں کے لیے بہت اہم ہے، کیونکہ اب ویزا درخواست کے عمل میں ایک بڑا مرحلہ ختم ہو گیا ہے۔ ای ویزا کے حامل افراد ایک شیئر کوڈ بھی بنا سکیں گے جو برطانوی سرحدوں یا دیگر متعلقہ حکام کے سامنے ویزا اسٹیٹس ثابت کرنے کے لیے استعمال ہوگا۔
مزید پڑھیں:گریس کا ڈیجیٹل نومیڈ ویزا: پاکستانیوں کے لیے کیا خاص ہے؟
ویزہ پروسیسنگ کے اوقات، اہلیت کے تقاضے اور ویزا کی شرائط میں کوئی تبدیلی نہیں آئی۔ ہائی کمیشن نے زور دیا کہ درخواست گزار کسی تیسرے فریق کے ایجنٹ سے نہ رجوع کریں اور صرف سرکاری برطانوی ویب سائٹ کے ذریعے درخواست دیں۔
مزید یہ کہ موجودہ اسٹیکر ویزے بھی کارآمد رہیں گے اور ان پر اس تبدیلی کا اثر نہیں پڑے گا۔ ای ویزا کے استعمال اور رسائی کے لیے مزید رہنمائی سرکاری برطانوی ذرائع سے حاصل کی جا سکتی ہے۔
