پاکستان کی سینئر اداکارہ صبا حمید نے حبا بخاری کو ڈرامے کی شوٹنگ کے دوران حقیقت میں تھپڑ مارنے کا انکشاف کیا ہے۔
صبا حمید نے حال ہی میں تابش ہاشمی کے پروگرام ’ہنسنا منع ہے‘ میں شرکت کی جہاں انہوں نے مختلف ڈراموں کے ہٹ سینز پر گفتگو کی۔ صبا حمید نے مشہور ڈرامے ’فتور‘ کے حوالے سے بات کرتے ہوئے اپنی بیٹی کا کردار ادا کرنے والی اداکارہ حبا بخاری کو تھپڑ مارنے کا قصہ سنایا۔
ان کا کہنا تھا کہ میں عموماً ڈراموں میں اصل تھپڑ نہیں مارتی کیونکہ میں شاٹ چالاکی سے دکھانے کی ماہر ہوں لیکن ڈائریکٹر نے زور دے کر کہا کہ اصل تھپڑ مارا جائے۔ صبا حمید نے کہا کہ پھر میں نے حبا بخاری کو تھپڑ مارا اور بعد میں معافی بھی مانگی۔ یہ تھپڑ واقعی کافی زور دار تھا۔ ایسے تجربے کسی بھی اداکار کے لیے آسان نہیں ہوتے لیکن یہ کردار کی ضرورت ہوتی ہے۔
واضح رہے کہ صبا حمید پاکستانی ٹیلی ویژن اور فلم کی معروف اداکارہ ہیں۔ وہ 35 برس سے زیادہ عرصے سے میڈیا انڈسٹری کا حصہ ہیں۔ ان کے مشہور ڈراموں میں فیملی فرنٹ، میرے ہمسفر، تھکن، لشکر، پیارے افضل، گھسی پٹی محبت، بارات سیریز، دل لگی، میرے ہمسفر اور لال عشق شامل ہیں۔ صبا حمید نے ڈرامہ ’جیسے آپ کی مرضی‘ کی ہدایت کاری بھی کی جو سپر ہٹ ڈرامہ تھا۔
