پشاور پولیس نے خیبرپختونخوا میں 9 مئی کے جلاؤ گھیراؤ اور پرتشدد احتجاج میں ملوث افراد کی جیو فینسنگ کے ذریعے شناخت کر لی ہے، ملوث افراد کو گرفتار کرنے کے احکامات جاری کر دیے گئے۔
رپورٹ کے مطابق پاکستان تحریک انصاف کے سابق ایم پی ایز، سابق ضلعی عہدیداران اور یوتھ ونگ کے متعدد رہنماؤں کے نام سامنے آئے ہیں۔
پشاورپولیس کے مطابق علاقے کی جیو فینسنگ مکمل کر لی گئی ہے، 9 اور10 مئی کو پرتشدد واقعات کے دوران کون، کس کے ساتھ رابطے میں تھا، جیوفینسنگ میں سب کچھ سامنے آگیا ہے۔
رپورٹ کے مطابق 9، 10 مئی کے پرتشدد مظاہروں میں سابق ایم پی ایزو پارٹی قائدین پرتشدد مظاہرین کے ساتھ رابطے میں تھے، پرتشدد مظاہرین کا سراغ لگانے کے لیے جے آئی ٹی تشکیل دیدی گئی ہے۔
’جے آئی ٹی میں پولیس اور ایجنسیوں نے جیو فنسنگ سمیت مختلف رپورٹس مرتب کرلی ہیں۔‘
رپورٹ میں بتایا گیا کہ پی ٹی آئی کے مقامی قائدین و سابق ایم پی ایز مختلف موبائل فونز کے ذریعے پرتشدد کارکنان کے ساتھ رابطے میں تھے جن میں سابق ایم پی اے فضل الٰہی، ملک واجد، پیرفدا محمد کا نام شامل ہے۔
پشاور کے سابق ضلعی ناظم عاصم خان سمیت پی ٹی آئی کے مقامی قائدین میں مینا خان،عبدالواجد، ہدایت خلیل، فرید گل ودیگر لوگوں کے نام رپورٹ میں سامنے آئے ہیں جو 9 اور 10 مئی والے دن کارکنان کے ساتھ براہ راست رابطے میں تھے۔
مزید پڑھیں
پولیس کے مطابق پی ٹی آئی کے پرتشدد مظاہرین پر مقدمات درج ہیں ان کی سخت نگرانی ہورہی ہے، تمام ملزمان کو موقع ملتے ہی گرفتار کر لیا جائے گا۔
’صوبہ بھر میں جہاں سے بھی اطلاع ملے نامزد ملزمان کو گرفتارکریں گے۔‘
پولیس نے سابق ایم این اے و صدر جنوبی اضلاع شاہد خٹک اور مرکزی یوتھ ونگ صدر مینہ خان آفریدی کو پہلے سے ہی گرفتار کر لیا گیا ہے۔
