ایران میں کشیدہ صورتحال کے ایران کے مختلف شہروں سے پاکستانیوں کے انخلا کا سلسلہ جاری ہے۔ حکام کے مطابق 70 سے زائد پاکستانی شہری ایران سے واپس اپنے وطن پہنچ چکے ہیں اور یہ عمل تسلسل کے ساتھ جاری ہے۔
ڈپٹی کمشنر گوادر نقیب اللہ کاکڑ نے مطابق گزشتہ روز ایران سے پاکستانیوں کے انخلا کا باقائدہ سلسلہ شروع کیا ہے جس کے پہلے مرحلے میں ایران میں پھنسے ہوئے 5 طلبا سمیت 51 پاکستانی شہری گبد ریمدان سرحد عبور کرکے بحفاظت وطن پہنچ گئے۔
یہ بھی پڑھیں: بارڈر پر دہشتگردی کے خلاف مشترکہ لائحہ عمل بنانے پر پاکستان ایران کا اتفاق
وطن واپس آنے والے پاکستانی شہریوں میں تاجر، سیاح اور طلبا شامل ہیں۔
انہوں نے بتایا کہ سرحد پر ایف آئی اے کی جانب سے 24 گھنٹے امیگریشن کی سہولیات فراہم کی جا رہی ہیں تاکہ وطن واپسی کے عمل کو تیز اور منظم بنایا جا سکے۔
ضلعی انتظامیہ کی جانب سے واپس آنے والے افراد کو رہائش، کھانے پینے اور سفری سہولیات بھی فراہم کی جا رہی ہیں۔
مزید پڑھیں: ایران میں جنگی صورت حال، پاکستانی شہریوں کی وطن واپسی کا عمل جاری
واپس آنے والے شہریوں کو سرحد پر مناسب سہولیات فراہم کی جارہی ہیں جبکہ جلد شہریوں کو کوئٹہ اور بعد ازاں ان کے آبائی علاقوں کی جانب روانہ کیا جائے گا۔
اس حوالے سے وزیر اعلیٰ بلوچستان میر سرفراز بگٹی نے کہا ہے کہ ایران میں جاری کشیدہ صورتحال کے پیش نظر وہاں مقیم پاکستانی شہریوں کی باحفاظت وطن واپسی کا باقاعدہ آغاز کر دیا گیا ہے۔
مزید پڑھیں: ایران پر حملے افسوسناک، پاکستان کے اندر احتجاج کو شدت میں بدلنا دشمن کو فائدہ پہنچائے گا، خواجہ آصف
سرحدی مقامات پر امیگریشن حکام 24 گھنٹے ڈیوٹی سرانجام دے رہے ہیں تاکہ آمد و رفت کا عمل مؤثر اور منظم بنایا جا سکے۔
وزیر اعلیٰ نے مزید کہا کہ بارڈر سے ملحقہ اضلاع کی انتظامیہ کو ہدایات جاری کر دی گئی ہیں کہ واپس آنے والے شہریوں کو ہر ممکن سہولیات اور ضروری معاونت فراہم کی جائے۔
