بنگلہ دیش کے وزیراعظم طارق رحمان نے منگل کے روز بنگلہ دیش کوسٹ گارڈ کو ہدایت کی ہے کہ وہ ملکی خودمختاری اور قومی مفادات کے تحفظ کے لیے مکمل طور پر تیار رہے اور سمندری سلامتی و آفات سے نمٹنے کے امور میں اپنا اہم کردار جاری رکھے۔
یہ ہدایات اس وقت جاری کی گئیں جب بنگلہ دیش کوسٹ گارڈ کے ڈائریکٹر جنرل ریئر ایڈمرل ایم ڈی ضیاء الحق نے بنگلہ دیش سیکریٹریٹ میں وزیراعظم کے دفتر میں ان سے ملاقات کی۔
یہ بھی پڑھیے: خلیجی وزرائے خارجہ کی بنگلہ دیشی تارکین وطن کی سلامتی کی یقین دہانی
ملاقات کے دوران وزیراعظم نے کوسٹ گارڈ کی حب الوطنی، پیشہ ورانہ مہارت اور ساحلی و دریا ئی علاقوں کے تحفظ کے عزم کو سراہا۔ انہوں نے ساحلی پٹی اور دریا کے کنارے واقع علاقوں میں امن و امان برقرار رکھنے کے ساتھ ساتھ انسانی ہمدردی اور ڈیزاسٹر مینجمنٹ میں فورس کے فعال کردار کی بھی تعریف کی۔
کوسٹ گارڈ کے سربراہ نے وزیراعظم کو ادارے میں جاری ترقیاتی اور جدیدکاری اقدامات سے آگاہ کیا۔ اس موقع پر وزیراعظم نے آپریشنل صلاحیتوں کو مزید مضبوط بنانے کے لیے حکومت کی جانب سے مکمل تعاون کی یقین دہانی کرائی۔
وزیراعظم نے بدلتی ہوئی علاقائی اور عالمی سیکیورٹی صورتحال کے تناظر میں کوسٹ گارڈ پر زور دیا کہ وہ ملکی سمندری حدود کے دفاع اور قومی مفادات کے تحفظ کے لیے اعلیٰ ترین سطح کی تیاری برقرار رکھے۔
