ایران کی مسلح افواج کے جنرل اسٹاف نے اس خبر کی سختی سے تردید کی ہے کہ ایران نے ترکیہ کی جانب کوئی میزائل داغا تھا۔ یہ بیان اس دعوے کے بعد سامنے آیا جس میں کہا گیا تھا کہ نیٹو دفاعی نظام نے ایران سے آنے والے ایک میزائل کو ترکیہ فضائی حدود میں داخل ہونے سے پہلے مار گرایا۔
ایرانی خبر رساں ادارے مہر نیوز ایجنسی کے مطابق ایرانی مسلح افواج کے بیان میں کہا گیا ’اسلامی جمہوریہ ایران کی مسلح افواج ہمسایہ اور دوست ملک ترکیہ کی خودمختاری کا احترام کرتی ہیں اور اس کی سرزمین کی جانب کسی بھی میزائل فائر کیے جانے کی تردید کرتی ہیں۔‘
دوسری طرف ترکیہ کی وزارتِ دفاع کے مطابق میزائل عراق اور شام کی فضائی حدود سے گزرتا ہوا ترکیہ کی فضائی حدود کے قریب پہنچا تھا۔ میزائل کو نیٹو کے دفاعی نظام نے تباہ کردیا، جس کے نتیجے میں کوئی جانی نقصان نہیں ہوا۔
ترکیہ کے صدر رجب طیب اردوان نے کہا کہ ان کا ملک نیٹو اتحادیوں کے ساتھ مشاورت میں تمام ضروری احتیاطی اقدامات کر رہا ہے۔ انہوں نے مزید کہا کہ مستقبل میں ایسے واقعات کی روک تھام کے لیے واضح اور سخت پیغامات جاری کیے جا رہے ہیں۔
