فتنہ الخوارج کی جانب سے سویلین آبادی کو نشانہ بنانے کا سلسلہ جاری ہے، میران شاہ کے بعد وانا کے رستم بازار میں زور دار دھماکا کیا گیا جس کے نتیجے میں 2 شہری جاں بحق جبکہ 20 سے زیادہ افراد زخمی ہو گئے۔
ذرائع کے مطابق دھماکے میں زخمی ہونے والوں میں زیادہ تر عام راہگیر شامل ہیں اور متعدد زخمیوں کی حالت تشویشناک بتائی جا رہی ہے۔
واضح رہے کہ گزشتہ روز بھی میران شاہ میں بارود سے بھری گاڑی کو عام عوام کے درمیان دھماکے سے اڑا دیا گیا تھا جس کے نتیجے میں بچوں سمیت متعدد شہری زخمی ہوئے تھے۔
ذرائع کا کہنا ہے کہ افغان طالبان کی جانب سے اپنے ملک میں مار کھانے کے بعد فتنہ الخوارج کے ذریعے قبائلی عوام میں خوف و ہراس پھیلانے کی کوشش کی جا رہی ہے۔
دھماکے کے بعد سیکیورٹی فورسز فوری طور پر موقع پر پہنچ گئیں اور علاقے کو گھیرے میں لے کر سرچ آپریشن شروع کردیا گیا ہے۔
واضح رہے کہ پاک افغان سرحد پر افغان فورسز کے خلاف سیکیورٹی فورسز کی مؤثر کارروائیوں کے باعث افغان طالبان پسپا ہونے پر مجبور ہیں، جبکہ اپنی ذلت آمیز شکست کا بدلہ لینے کے لیے خوارجی دہشتگردوں کے ذریعے معصوم عوام کو نشانہ بنایا جا رہا ہے۔
