عیدالفطر کے موقع پر شہریوں کی سہولت اور ٹریفک کی روانی برقرار رکھنے کے لیے اسلام آباد ٹریفک پولیس نے مربوط ٹریفک پلان ترتیب دے دیا ہے۔
پولیس کے مطابق شہر کی مختلف مارکیٹوں میں ٹریفک کے نظم و ضبط کو برقرار رکھنے کے لیے 470 ٹریفک افسران تعینات کیے گئے ہیں۔ عید کی خریداری کے دوران مارکیٹوں میں ہلڑبازی، ڈرفٹنگ اور ون ویلنگ کے خلاف سخت کارروائی کی جائے گی۔
ترجمان کا کہنا ہے کہ عید تک مارکیٹوں میں محدود انفورسمنٹ رکھی جائے گی جبکہ خریداری کے لیے آنے والے شہریوں کو آگاہی اور سہولیات فراہم کی جائیں گی۔
انہوں نے کہا کہ اسلام آباد ٹریفک پولیس شہریوں کی خوشیوں میں برابر کی شریک ہے اور ان کی آسانی کے لیے تمام ممکنہ اقدامات کیے جا رہے ہیں۔
شہریوں سے اپیل کی گئی ہے کہ وہ اپنی گاڑیاں صرف مقررہ پارکنگ مقامات پر کھڑی کریں اور ٹریفک پولیس کے ساتھ تعاون کریں۔
ترجمان کے مطابق اگر کہیں ہلڑبازی، ون ویلنگ یا ڈرفٹنگ نظر آئے تو اس کی اطلاع فوری طور پر 1915 یا پکار 15 پر دی جا سکتی ہے۔
