وزیرِ اعظم محمد شہباز شریف کی زیر صدارت اجلاس میں فیصلہ کیا گیا ہے کہ مہنگی اور لگژری گاڑیوں میں استعمال ہونے والے ہائی آکٹین فیول پر لیوی میں اضافہ کیا جائے گا، جس سے حکومت کو ماہانہ اربوں روپے کی بچت ہوگی اور اس ریلیف کو عوام تک منتقل کیا جائے گا۔
یہ بھی پڑھیں:عید کے موقع پر وزیراعظم شہباز شریف کا پیٹرول و ڈیزل کی قیمتیں برقرار رکھنے کا اعلان
وزیرِ اعظم نے وڈیو لنک اجلاس میں ہدایت دیتے ہوئے کہا کہ مہنگی گاڑیوں میں استعمال ہونے والے ہائی آکٹین فیول پر لیوی بڑھائی جائے تاکہ معیشت پر بوجھ کم ہو اور امیر طبقہ زیادہ حصہ ڈالے۔
اجلاس میں فیصلہ کیا گیا کہ امیر ترین طبقے کی لگژری گاڑیوں میں استعمال ہونے والے ہائی آکٹین فیول پر موجودہ لیوی 100 روپے فی لیٹر سے بڑھا کر 300 روپے فی لیٹر کر دی گئی ہے۔ اس فیصلے کے بعد حکومت کو تقریباً 9 ارب روپے ماہانہ بچت متوقع ہے۔
وزیراعظم نے کہا کہ اس بچت کو عوامی ریلیف کے لیے استعمال کیا جائے گا، جبکہ اس اقدام کا مقصد یہ بھی ہے کہ ملک کے وسائل کا بوجھ زیادہ تر صاحبِ حیثیت طبقہ اٹھائے۔
اجلاس میں واضح کیا گیا کہ عام گاڑیوں میں استعمال ہونے والے ایندھن کی قیمتوں میں کوئی اضافہ نہیں کیا گیا، اور نہ ہی اس فیصلے سے پبلک ٹرانسپورٹ یا ہوائی جہازوں کے کرایوں پر کوئی اثر پڑے گا۔
یہ بھی پڑھیں:پیٹرول اور ڈیزل کی قیمتوں میں بہت بڑا اضافہ روک دیا گیا، عطا تارڑ
وزیرِ اعظم نے اس سے قبل ہائی آکٹین فیول کے معاملے کا نوٹس لیتے ہوئے متعلقہ وزارت کو لائحہ عمل تیار کرنے کی ہدایت کی تھی۔
اجلاس میں وفاقی وزیر قانون و انصاف اعظم نذیر تارڑ، وزیر خزانہ محمد اورنگزیب، وزیر اطلاعات عطاء اللہ تارڑ، وزیر پیٹرولیم علی پرویز ملک اور دیگر اعلیٰ حکام نے شرکت کی۔
