این ڈی ایم اے کے نیشنل ایمرجنسیز آپریشن سینٹر نے 24 سے 31 مارچ تک ملک بھر میں گرج چمک کے ساتھ بارش، آندھی اور ژالہ باری کا الرٹ جاری کر دیا ہے۔
این ڈی ایم اے کے مطابق مغربی ہواؤں کا سلسلہ بلوچستان کے جنوب مغربی علاقوں سے داخل ہو کر ملک کے بیشتر حصوں کو متاثر کرے گا۔ اسلام آباد اور پنجاب کے مختلف شہروں بشمول مری، راولپنڈی، اٹک، جہلم اور لاہور میں 25 سے 26 مارچ کے دوران بارش متوقع ہے، جبکہ 28 سے 30 مارچ کے دوران بارشوں میں شدت اور بعض مقامات پر ژالہ باری کا امکان ہے۔
مزید پڑھیں: کراچی میں تیز ہواؤں کے ساتھ بارش، مختلف حادثات میں 19افراد جاں بحق
خیبرپختونخوا کے اضلاع چترال، سوات، دیر، مانسہرہ اور ایبٹ آباد سمیت دیگر علاقوں میں بھی 25 سے 26 مارچ تک بارش اور آندھی کی پیشگوئی کی گئی ہے، جبکہ 28 سے 30 مارچ کے دوران پہاڑی علاقوں میں برفباری متوقع ہے۔
گلگت بلتستان اور آزاد کشمیر کے مختلف علاقوں میں بھی بارش اور برفباری کا امکان ظاہر کیا گیا ہے، جبکہ بلوچستان اور سندھ کے کئی اضلاع میں بھی مختلف تاریخوں میں بارش اور تیز ہوائیں چلنے کی توقع ہے۔
این ڈی ایم اے نے خبردار کیا ہے کہ تیز ہوائیں، آسمانی بجلی اور ژالہ باری کمزور تعمیرات، درختوں اور بجلی کی تنصیبات کو نقصان پہنچا سکتی ہیں، جبکہ بارش کے باعث سڑکیں پھسلن کا شکار ہو کر ٹریفک متاثر ہونے کا خدشہ ہے۔
مزید پڑھیں: آندھی اور طوفان، خیبرپختونخوا میں 8 افراد جاں بحق، 21 زخمی
ادارے نے شہریوں کو غیر ضروری سفر سے گریز، محتاط ڈرائیونگ اور موسمی ہدایات پر عمل کرنے کی ہدایت کی ہے، جبکہ سیاحوں کو شمالی علاقوں کا سفر کرنے سے پہلے موسم اور سڑکوں کی صورتحال چیک کرنے کا مشورہ دیا گیا ہے۔
مزید برآں، تمام صوبائی اور ضلعی اداروں کو ممکنہ صورتحال سے نمٹنے کے لیے الرٹ رہنے کی ہدایت بھی جاری کر دی گئی ہے۔
