وزیر مملکت برائے خارجہ امور حنا ربانی کھر 5 سے 13 جون تک ناروے، سویڈن، ڈنمارک اور بیلجیئم کے سرکاری دورے کریں گی۔ وزیر مملکت ترقی، تجارت اور انسداد موسمیاتی تبدیلی میں سیاسی شراکت اور تعاون پر وزارتی اجلاسوں میں شریک ہوں گی، وہ قانون سازوں اور مقامی تاجروں سے بھی ملاقات کریں گی۔
ترجمان دفتر خارجہ کے مطابق وزیر مملکت برائے خارجہ امور حنا ربانی کھر بیلجیئم میں یورپی پارلیمنٹ کے اراکین اور یورپی کمیشن کے سینئر حکام سے بھی ملاقاتیں کریں گی۔ سویڈن میں یورپی کونسل برائے خارجہ تعلقات کے سالانہ اجلاس میں مرکزی اسپیکر کے طور پر شرکت کریں گی اور علاقائی اور عالمی اہمیت کے مسائل پر پاکستان کا نقطہ نظر پیش کریں گی۔
ترجمان دفتر خارجہ کے مطابق وزیر مملکت برائے خارجہ امور حنا ربانی کھر خارجہ پالیسی کی ترجیحات اور چیلنجز پر یورپ کے سرکردہ فیصلہ سازوں، ماہرین، تھنک ٹینکس کے ساتھ بھی بات چیت کریں گی۔
