قومی فضائی کمپنی پی آئی اے نے 6 سال کے وقفے کے بعد لندن کے لیے اپنی پروازیں بحال کر دیں، پہلی پرواز 325 مسافروں کو لے کر اسلام آباد سے روانہ ہوئی۔
قومی فضائی کمپنی پاکستان انٹرنیشنل ایئرلائنز (پی آئی اے) نے 6 سال بعد لندن کے لیے اپنے فضائی آپریشن کا باضابطہ آغاز کر دیا۔ پہلی پرواز پی کے 785، 325 مسافروں کو لے کر اسلام آباد سے لندن روانہ ہوئی۔
اسلام آباد ایئرپورٹ پر پرواز کی روانگی سے قبل ایک سادہ مگر باوقار تقریب کا انعقاد کیا گیا، جس میں سیکریٹری دفاع لیفٹیننٹ جنرل (ر) محمد علی، برطانوی ہائی کمشنر جین میریٹ، پی آئی اے کنسورشیم کے چیئرمین عارف حبیب اور ہوابازی کے اعلیٰ حکام نے شرکت کی۔
تقریب کے دوران افتتاحی کیک کاٹا گیا، جبکہ قرعہ اندازی کے ذریعے ایک خوش نصیب مسافر کو 660 سی سی گاڑی بھی انعام میں دی گئی۔ دیگر مسافروں کو بھی مختلف تحائف پیش کیے گئے۔
تقریب سے خطاب کرتے ہوئے سیکریٹری دفاع نے کہا کہ لندن کے لیے پروازوں کی بحالی پاکستان اور برطانیہ کے درمیان تعلقات کو مزید مضبوط بنانے میں مددگار ثابت ہوگی۔
برطانوی ہائی کمشنر جین میریٹ نے بھی اس موقع پر پی آئی اے کو لندن آپریشن کی بحالی پر مبارک باد دی۔
پی آئی اے حکام کے مطابق کمپنی برطانیہ میں مقیم 16 لاکھ سے زائد پاکستانیوں کو براہ راست سفری سہولیات فراہم کرنے کے لیے پرعزم ہے۔
مزید بتایا گیا کہ کل 30 مارچ سے لاہور سے لندن کے لیے بھی ہفتہ وار پرواز کا آغاز کیا جا رہا ہے۔ ابتدائی مرحلے میں پاکستان اور لندن کے درمیان 4 ہفتہ وار پروازیں چلائی جائیں گی، جن میں 3 اسلام آباد اور ایک لاہور سے آپریٹ ہوگی۔
واضح رہے کہ لندن پی آئی اے کی پہلی بین الاقوامی منزل تھی اور اس روٹ سے قومی ایئرلائن کا 71 سال پرانا تعلق ہے۔
لندن کے ہیتھرو ایئرپورٹ پر بھی اس موقع پر خصوصی تقریب کا اہتمام کیا گیا ہے، جہاں برطانیہ میں پاکستان کے ہائی کمشنر ڈاکٹر محمد فیصل پرواز کا استقبال کریں گے اور واپسی کی پہلی پرواز کے مسافروں کو الوداع کہیں گے۔
تقریب کے اختتام پر پی آئی اے کے چیف ایگزیکٹو آفیسر کی جانب سے مہمانانِ خصوصی کو یادگاری شیلڈز بھی پیش کی گئیں۔
