جویریہ سعود کو یمنیٰ زیدی کی عمر کا مذاق اڑانا مہنگا پڑ گیا جس نے ناظرین اور فنکار ساتھیوں کی جانب سے شدید ردعمل پیدا کر دیا اور ساتھی اداکار ان کی بھرپور حمایت میں سامنے آگئے۔
حال میں جویریہ سعود نے اپنے پروگرام میں مشہور اداکارہ یمنیٰ زیدی کی بچپن کی تصویر کے حوالے سے غلط معلومات نشر کیں۔ پروگرام کے میزبان جویریہ سعود نے تصویر یمنیٰ زیدی کی بتائی اور ان کی عمر کا مذاق اڑاتے ہوئے کہا کہ کچھ لوگ پتھر کے زمانے سے کام کر رہے ہیں لیکن ہٹ ابھی ہوئے ہیں۔
یمنیٰ زیدی نے انسٹاگرام پر ردعمل دیتے ہوئے کہا کہ یہ میری بچپن کی تصویر نہیں ہے۔ یہ غلط معلومات ہیں۔ براہ کرم نشر کرنے سے پہلے معلومات کی تصدیق کریں۔
مایا علی نے سوشل میڈیا پر سوال اٹھایا کہ صنعت اپنے ہی فنکاروں کی توہین کیوں کرتی رہتی ہے۔ انہوں نے لکھا کہ ہم اپنے ٹیلنٹ کا احترام کب شروع کریں گے؟ فنکار اپنی زندگیاں اپنے فن کے لیے وقف کر دیتے ہیں اور افسوسناک بات یہ ہے کہ اکثر ہماری اپنی انڈسٹری کے لوگ ہی بڑے پلیٹ فارمز پر عوامی سطح پر دوسروں کو نیچا دکھاتے ہیں۔
ہانیہ عامر نے بھی مایا علی کے بیان کو دوبارہ شیئر کیا اور لکھا کہ جو انہوں نے کہا وہ بالکل ٹھیک کہا۔
جویریہ سعود نے معاملے کی سنگینی کو دیکھتے ہوئے عوامی سطح پر معذرت کر لی ہے۔ انہوں نے وضاحت کی کہ تصویر سوشل میڈیا سے بغیر تصدیق کے لی گئی تھی اور ان کا مقصد کسی کی دل آزاری کرنا یا عمر کا مذاق اڑانا نہیں تھا۔ وہ یمنیٰ زیدی کے لیے دل سے احترام کرتی ہیں۔ انہوں نے مزید کہا کہ ان کے تبصرے کو غلط سمجھا گیا۔
