سائنسدانوں نے کوانٹم ٹیلی پورٹیشن میں اہم پیشرفت کی ہے، جس سے فوری سفر کا تصور حقیقت کے قریب آ گیا ہے، لیکن یہ صرف کوانٹم سطح پر ممکن ہے۔ یونیورسٹی آف راچسٹر اور پرڈیو یونیورسٹی کے محققین نے دکھایا ہے کہ ایک ذرے کی کوانٹم حالت کو دوسرے دور موجود ذرے تک منتقل کیا جا سکتا ہے، بغیر کسی جسمانی مادے کو حرکت دیے، جسے ’اینٹینگلمنٹ‘ کہا جاتا ہے۔ اس عمل سے ذرات کے درمیان فاصلہ کوئی رکاوٹ نہیں بنتا۔
اس کی مثال سائنسی فکشن میں دکھائے جانے والے اسٹار ٹریک کے ٹیلی پورٹرز جیسی ہے، جو جسمانی اشیا کو تباہ کر کے دوبارہ بناتے ہیں۔ کوانٹم ٹیلی پورٹیشن صرف ذرات کے درمیان معلومات منتقل کرتی ہے۔ آئی بی ایم کوانٹم کے سینیئر سائنسدان جیسن اورکٹ کے مطابق قدرتی طور پر سب کچھ کوانٹم ہے اور آپ بھی کوانٹم ہیں۔
یہ بھی پڑھیں:ناسا کا سائنسدان خلا میں پراسرار طور پر بولنے کی صلاحیت کھو بیٹھا
کوانٹم ٹیلی پورٹیشن کے تجربات 1990 کی دہائی میں چھوٹے فاصلے پر شروع ہوئے۔ بعد میں تحقیق نے دکھایا کہ یہ لمبے فاصلے حتیٰ کہ زمین اور مدار میں موجود سیٹلائٹ کے درمیان بھی ممکن ہے۔ 2017 میں چینی سائنسدانوں نے زمین اور سیٹلائٹ کے درمیان کامیابی سے ٹیلی پورٹیشن کا مظاہرہ کیا۔
تاہم کوانٹم قوانین کے مطابق ذرات کی نقل بغیر اصل کو تباہ کیے ممکن نہیں، جسے ’نو کلوننگ تھیورم‘ کہا جاتا ہے۔ اس کا مطلب ہے کہ انسانوں کا ٹیلی پورٹیشن فی الحال ممکن نہیں۔ اگر یہ تکنیک بڑھے بھی تو اخلاقی اور فلسفیانہ سوالات پیدا ہوں گے، جیسے ’کیا ٹیلی پورٹ ہونے والا شخص اصل ہی ہوگا یا صرف اس کی نقل؟‘۔
اس کے باوجود کوانٹم ٹیلی پورٹیشن سائنس کے لیے بہت اہم ہے۔ یہ ’کوانٹم انٹرنیٹ‘ اور طاقتور کوانٹم کمپیوٹر بنانے میں مدد دے سکتی ہے، جو ایسے مسائل حل کر سکتے ہیں جو موجودہ کمپیوٹر نہیں کر سکتے۔ یہ کمپیوٹر مالیکیولز اور کیمیائی عمل کی درست نقل تیار کر کے بہتر کھاد، نئے مواد اور دوائیں بنانے میں مدد دے سکتے ہیں۔
فی الحال انسانوں کا ٹیلی پورٹیشن سائنس فکشن ہی ہے۔ اورکٹ کے مطابق انسان یا ایٹم کو ٹیلی پورٹ کرنے کا سوال ابھی صرف قیاس آرائی میں ہے۔ یہ کامیابی سائنس میں پیشرفت دکھاتی ہے، مگر ہماری شناخت اور وجود کے فلسفیانہ سوالات کو بھی سامنے لاتی ہے۔
