نیشنل الیکٹرک پاور ریگولیٹری اتھارٹی نیپرا نے سولر ریگولیشنز 2026 جاری کرتے ہوئے نیٹ میٹرنگ سے متعلق نوٹیفکیشن جاری کر دیا۔
نوٹیفکیشن کے مطابق پہلے سے موجود سولر نیٹ میٹرنگ صارفین کے معاہدوں میں کسی قسم کی تبدیلی نہیں ہوگی اور ان کے لائسنس اپنی مقررہ مدت تک برقرار رہیں گے۔
یہ بھی پڑھیں: سولر صارفین کے لیے خوشخبری، نیپرا کا موجودہ صارفین کے لیے نیٹ میٹرنگ پالیسی برقرار رکھنے کا فیصلہ
نیپرا نے واضح کیا ہے کہ موجودہ صارفین کو سابقہ معاہدوں کے طریقہ کار کے تحت ہی بل کیا جائے گا۔ تاہم اگر کوئی صارف اپنی سولر صلاحیت میں تبدیلی کرے گا تو اسے پہلے والا نرخ نہیں ملے گا۔
نوٹیفکیشن میں کہا گیا ہے کہ سولر ریگولیشنز 9 فروری 2026 سے نافذ العمل ہوں گے۔
یہ بھی پڑھیں: نیٹ میٹرنگ سے نیٹ بلنگ سولر صارفین کے لیے دھچکا کیوں؟
یاد رہے کہ اس سے قبل نیپرا نیٹ میٹرنگ صارفین کیلئے یونٹ کے بدلے یونٹ کا نظام ختم کر چکا تھا، جبکہ ذرائع کے مطابق نئے صارفین کیلئے نیٹ میٹرنگ کی جگہ نیٹ بلنگ متعارف کرائی گئی تھی۔
ذرائع کا کہنا ہے کہ وزیر اعظم کی ہدایت پر پاور ڈویژن نے نیپرا کو پرانے سولر صارفین کیلئے سابقہ پالیسی برقرار رکھنے کی ہدایت دی تھی۔
