لاہور کے علاقے ہیئر فیز 9 میں نامعلوم چور نے پاکستانی انفلوئنسر اسد اسحاق کے گھر کا صفایا کر دیا۔ پولیس نے واقعے کا مقدمہ درج کر کے تفتیش شروع کر دی ہے جبکہ سی سی ٹی وی کی مدد سے ملزم کو ٹریس کرنے کی کوششیں جاری ہیں۔
یہ بھی پڑھیں:لاہور میں 19 کروڑ کی ڈکیتی، ڈاکوؤں نے کیسے جیمرز لگا کر ڈکیتی کی؟
پولیس کے مطابق لاہور کے علاقے ہیئر فیز 9 میں نامعلوم چور انفلوئنسر اسد اسحاق کے گھر سے نقدی، زیورات اور دیگر قیمتی اشیا چوری کر کے فرار ہو گیا۔ اطلاع ملتے ہی ہیئر پولیس موقع پر پہنچ گئی اور فرانزک ٹیم کے ساتھ شواہد اکٹھے کر لیے گئے۔
ایس پی کینٹ اختر نواز کے مطابق متاثرہ کی بیوی شزا اسحاق کی مدعیت میں نامعلوم ملزم کے خلاف مقدمہ درج کر لیا گیا ہے۔ انہوں نے ایس ڈی پی او برکی آصف عطا کو فوری طور پر ملزم کو ٹریس کر کے گرفتار کرنے کی ہدایت بھی جاری کی ہے۔
پولیس کا کہنا ہے کہ ملزم کو سی سی ٹی وی کیمروں اور دیگر ذرائع کی مدد سے جلد گرفتار کر لیا جائے گا۔
یہ بھی پڑھیں:سحری کے بعد گھر لوٹنے والے خاندان پر ڈاکوؤں کا دھاوا، لاہور میں سال کی سب سے بڑی ڈکیتی
دوسری جانب اسد اسحاق کی اہلیہ شزا اسحاق کا ویڈیو بیان بھی سامنے آ گیا ہے، جس میں انہوں نے بتایا کہ واردات کے وقت گھر میں کوئی موجود نہیں تھا۔ ان کے مطابق جب وہ گھر پہنچیں تو سامان بکھرا ہوا تھا اور چور سونا، نقدی اور کیمرے سمیت قیمتی اشیاء لے جا چکے تھے۔
شزا اسحاق نے مزید بتایا کہ چور دروازوں کے تالے توڑ کر گھر میں داخل ہوئے اور واردات کے بعد فرار ہو گئے۔ پولیس نے واقعے کی تحقیقات شروع کر دی ہیں اور ملزمان کی تلاش جاری ہے۔
