مشرق وسطیٰ میں جاری کشیدگی کے باعث بلوچستان میں آج سے کفایت شعاری کے فیصلوں پر عملدرآمد شروع ہو گیا۔
کوئٹہ سے جاری ہونے والے نوٹیفکیشن کے مطابق توانائی کی بچت اور عوامی سہولت کے لیے مارکیٹوں، شادی ہالز اور ریستورانوں کے اوقات کار میں تبدیلی کی گئی ہے۔
محکمہ داخلہ بلوچستان کی ہدایات کے مطابق مارکیٹیں اور شاپنگ مال رات 8 بجے کے بعد بند ہو جائیں گے، جبکہ دوا خانے، بیکریاں اور تندور اس پابندی سے مستثنیٰ ہیں۔
شادی ہال، ضیافت ہال اور ہوٹلوں میں ہونے والی تقریبات رات 10 بجے تک ختم کرنے کی ہدایت دی گئی ہے، اسی طرح ریستوران اور ہوٹل بھی رات 10 بجے تک بند ہوں گے۔
ضلعی انتظامیہ اور قانون نافذ کرنے والے اداروں کو ہدایت کی گئی ہے کہ یہ فیصلے سختی سے نافذ کریں، اور عوام سے درخواست کی گئی ہے کہ توانائی کے بحران سے نمٹنے کے لیے مکمل تعاون فراہم کریں۔
